ْعهد يالباقر تشاهد جنون لعابس بعاشور
الخدمه تبقى تاج الراس تشهد ام ضلع مكسور
رجال الله تدرينه مخابرنه ومظاهرنه
مثل فرض الصلاه والصوم شعائرنه ومنابرنه
دنيه تسكت ونصرخ ياحسين بضمايرنه
والآيه الكريمه تگول انَ سعيكم مشكور
نسعه للحسينيات حبيب ابن مظاهر حيث
يسجل كل اسامينه مدامعنه تهل ﭼالغيث
احنه تربية حيدر وكل واحد تشوفه ليث
نتبسم في وجه الموت وبسوح المنايه اندور
لاجل المنذبخ عطشان مهجتنه فدوه ارخصها
وخدام الحسين الله بأعلى مرتبه خصهـا
علامات العشگ بينه بهالموقف نلخصها
لمن نطبر الهامات وتهني الولد والحـور
كل خادم يشد حيله بهيامه وحبه متحمس
خطيب وشاعر ورادود ولطامه وخدم تكنس
وهذا اللي ترك بيته ويوزع ماي بالمجلس
ويطبخ زاد ابو السجاد تگله فاطمه مأجور
عقيده عدنه يالباقر عابس كل سنه يحضر
يتنزل من الجنات ويقبل عتبة المرمر
ويكشف صدره وينادي هله بخدام ابو الاكبر
يظل وسط العزا شادود يحمسنه بلطم الصدور
عهد ما تنطفي الحرگه نرفع راية العباس
نجزع بالبجي والنوح على اللي سلبتها ارجاس
زينب زينب الحورا حزنها خالط الانفاس
رقيه وسكنه والايتام نهديهم دمه وانحـور
جبال الراسيه كلنه وماهمنه الحاداثين
فصلي لربك وانحر وبهالآيه متمسكين
صلينه بعشگ عباس نحرنه الفرحه لاجل حسين
مع المهدي حليف الثار مشايه املنه انزور
كلمات الشاعر
حسين بوجباره ابو نجم
تعليقات
إرسال تعليق