ياعباس بزنودك ....سالم الله ايعودك
بالجف الرويه
..................
ياعباس ذا العاشور يومك بالوصيه
حل اليوم يالمذخور لايام البليه
يامحلاه بيده الواه والگمره ضويه
شف اصدور غيضه ايفور جيدوم السريه
تگحمها هلا بحامي الحميه
وداس بحافره فوگ المنيه
تعاين هالعجايب بالسويه
وباليمنه يشيل اعله الثنيه
شلت الزود من عودك
سالم الله يعودك
بالجف الرويه
................. ............ .
شد ازمام جوده وهام يتوخى العشيره
سد اصفوف جيش ألوف وبڰلبه سعيره
طفل احسين شافه ايلوج بعيون البصيره
شب نيران فوگ الهيم تتلوى بضميره
نبض عرگ الشهامة الهاشميه
وصار اعجاج صك الغاضريه
ابن حيدر زعل وينه كفيه
آه او ويل من ضربه ورميه
حرز الله على ازنودك
سالم الله ايعودك
بالجف الرويه
..........
دمه ايفور يسطع نور من غرة جبينه
هاي انجوم فوكه اتحوم نزلتها ابسكينه
رف اجناح فوك ارماح والسيف ابيمينه
واخله اسروج جنها ابروج مدروعه وحصينه
حط روس العده لزنده تجيه
وشب صدر المطهم من صليه
جبايلها سوادر معتنيه
مساميها جنايز ملتويه
يوم الملحمه اسعودك
سالم الله ايعودك
بالجف الرويه
............
دنك راس واخلى ارجاب يتولى شجيره
صاراهدود ماله اصدود عن ضرب الشفيره
جاه اعمود فوك الهام واتسجى ابعفيره
وجاله احسين بلا جفين طوح بالكسيره
يخويه العلم وينه واوين جفك
يانسر اخيام زينب وين رفك
على خيل الطلايع وين رجفك
امكطعينك يخويه شلون اصفك
ظني خاب بردودك
سالم الله ايعودك
بالجف الرويه
...........
خر حسين فوكه وصاح ياحيدر وصلكم
عن عباس وافي الباس زهرتنه وكمركم
صان اعهود. اوضم الجود وفت هامه ابنصركم
عينه اخسوف راسه اخسوف بس حاضن علمكم
ضيعني يبويه وحرت بامري
ثگل يابه الحمل وانكسر ظهري
تشتت عسكري وانهتك خدري
واصيح بزينب اعله الضيم صبري
سالم الله ايعودك
ياعباس بزنودك
بالجف الرويه
...................
الشاعر
غازي الحداد
تعليقات
إرسال تعليق