قصيدة " سوق النخاسة "
رحت لســوق النخــاسة
حل محرم وأهمل العين
بدمعي واگـــــف واتاني
يشتريني الســيد حسين
حسين .. تگــــول الاعـــراب
يحسبلي حساب .. ابنه علي
حسين .. كــــل الامــــــــال
يناديني تعال .. انـــت الــي
〰〰〰〰〰〰〰〰〰〰
طحت ببئر مــره واجــت ناسي اليه
تبجي وتمد ايديها الي ومتلوح اديه
( واعرفت عدهم حبل بعدين )
هنا واعــرفت هذا الگلب محد يفيده
واللي يحبك من صدگ ويمدلك ايده
( بس واحد يسمونه الحسين )
هو الصدگ من يحضن يدفّي
يشــلع سهــام لحضنك تكفّي
ايده اجمل ايد التاخذ بجفّي
- تسوى النسمه ايده -
طفــــل وتحمـلني امي
والحسين يمـد جفوفه
شتتوقع ابقــى ســـاكن
حتى حضن امي اعوفه
حسين .. رزق الاحســاس
اي والعباس .. يسوى هلي
حسين .. كــــل الامـــــال
يناديني تعال .. انــت الي
〰〰〰〰〰〰〰〰〰〰
بين العبيد اني اوگفت دمعي اعله عيني
خـــايف يجي غــير الحسين ويشتريني
( ما اشتغل عد غيره خدّام )
يمــرني عزيز وحـاشيه و وجهي اديره
وارتــاح من اســمع يگلهم شوفوا غيره
( وابقى انتظر لحسين ايام )
الما يخدمه لو گال احب كذّب
والمــا يحب ابـو علي ما حب
ما يگضي ليله يسولف بزينب
- ليل بلا مشاعر -
مـــا حــب اللـــيله بــارد
الما تبـــات بروحه خيمه
عــايش كـــل مغـــربيــه
طفله تبجي و بالي هيمه
حسين .. استــــر مسـلوب
وبكل غروب .. نوحي علي
حسين .. كـــل الامـــــال
يناديني تعال .. انـت الي
〰〰〰〰〰〰〰〰〰〰
بذاك العصر مر واحد بوجهه ابتسامه
شفتـه الوحيد اللايگـه براسه العمامه
( والحلوة شفته اعليه قادم )
بدكّــة الســـوگ وگمت الوحله بإديه
فــدوه اشتريني صحـت يبن الزجيه
( يابو علي متريد خادم ؟ )
اقبلني واحسبني شنو تحسب
لطــام شــاعر مــلا ابو موكب
إلمـهم خــادم ســيدي تكــتب
- والخدمه حياتي -
يخـــــلـــق الله شيـعــه
تبجي عاللي داسه حافر
هنيــالـــه اللي تشـمــله
ويكضي كل سنينه جابر
حسين .. يا بسمه وآه
انه بلياه .. عمري خلي
حسين .. كــل الامــــال
يناديني تعال .. انت الي
〰〰〰〰〰〰〰〰〰〰
صـــار الحلم اجـمل حقـــيقه وبيهــا اني
بسوق النخاسه من اجه حسين اشتراني
( وهنا صرت كلي ابتسامه )
وياه مشيت وجني ما ماشي بحياتي
گــلي امنيــاتك گتله حققت امنيــاتي
( والحمد لله عالخدامه )
معنى اليخدمك يكتمل دينه
تبين صــلاة اللــــيل بجبينه
لله يبيع البـــاعـــــك اسنينه
- يوصل لله دربك -
الدوّر عـــن الله شـافـك
انت بــــاب الله وعيونه
ذاك انــــت الـــمُتــفــرّد
الكلشي ما نسوى بدونه
حسين .. بدمــــاي افــــديه
بگلبي انظر ليه .. احلى ولي
حسين .. كــــل الامــال
يناديني تعال .. انت الي
〰〰〰〰〰〰〰〰〰〰
خـادم واجددله العهد كلماجه عاشور
ميزل وليغير مشي البيه وفه الناعور
( عايش عله ونين المصيبه )
تتجـــمل الدنيا وتجي تمر اعله دربي
ومثل الصغير وحاجته ما انطي گلبي
( والخدمه بس هي الحبيبه )
الخدمه حبل ما بينك وبيني
وإدعـي الي ما تفلت ايميني
كلــما طحت حبلك ينجيني
- هنيالي بخدمتك -
طوفـــــان الدنيا تدري
وانه اليخاف اعله دينه
يا نـــوح ايامي دخيلك
ما اطيـــح من السفينة
حسين .. بعيني مخــلــيه
وگلبي بطاريه .. يغلي غلي
حسين .. كـــــل الامــــال
ينــاديني تعال .. انت الي
.
#ميثاق_الحمداني
تعليقات
إرسال تعليق