القصيدة الاولى
لمن علي الاكبر ظهـر :
حيدر ..
من هيبته صاح الگمـر :
حيدر ..
ما اگلك يبن اخوي
يا هلا بجية ابوي
حيدر ..
ـــــــــــــــــــــــــــ
من علـــي الاكــبر طلع
حيــدره للطف رجــــع
توّها حانت ساعته
الزمـــن بيده انطـــوى
وصــوته زلـــزل نينوى
يا محمد صيحتــه
صاح ابو فاضـل هلا بزلزالهـا
ياهزيـــم اليرعـــــد بآجـــــالها
انت ابوي اليخـــــرج الاثقـالها
وهذا يا حيـدر اعداءك حالها
يا منصور والهــا امت :
حيدر ..
بيك آمنت لمن شفــت :
حيدر ..
افتح ابواب الجحـــيم
واسقي اعداءك حميم
حيدر ..
ـــــــــــــــــــــــــــ
بلايا رحمه ولا لطف
الزمرة السبعين الف
يا منيه عجّلي
هللت كــــل الخــــيم
من هتف راعي العلم
يا هلا بحيدر علي
ساعــــة اعــداءك فقـارك ميلها
اي يضيغم سـارع بتعجيلــــها
الموت الاحمر انت ياعزريلهــا
دمدم وخليـــه مطـــر سجليها
لمن رجع الها ابن ود :
حيدر ..
انت الابن غــــانم ترد :
حيدر ..
بوالدك عاد الرســــول
ارجع بفحــل الفحول
حيدر .. حيدر
ـــــــــــــــــــــــــــ
علي باء البسمله
وانت كاف الكربله
اي يا اول هاشمــي
ابني ياروح الولي
بالاسم انت علي
وبالفعل نِعــم السمي
يا سجل اطــوي بديك كتــابها
ردت بليث الحجــــــاز اسبابها
اگطع الاصــلاب فرق احزابهــــا
يا اسد باســــل يسيـــــــد غابها
طحن الرحى تـوّه بده :
حيدر ..
يا عاصف وذره العده :
حيدر ..
خلي اعـــداءك هشيم
بكيفك وانت القسيـم
حيدر ..
ـــــــــــــــــــــــــــ
انت والمحــــد بعــــد
قسور ومن ظهر اسد
هذا زود الطالبي
عمر امـــك فاطمــه
اي يحمـــــاي الحمه
يا هلا بوجه النبي
ويا عِبــــــاء اللي يلـــــم الآله
خمس معصـومين انت كَبـاله
رد للحسين التغيّر حالـه
ها يا ابنه ووالـــده وآمـــاله
بصدر الابو انت الهوه
حيدر ..
وبعدك طفه بعينه الضوه
حيدر ..
وامك بذيج الخيام
تدعي يارب بالامام
حيدر ..
ـــــــــــــــــــــــــــ
الگلب عمه من سعد
قبّل الرايه وسجد
للحمد سجدة شكر
والحسين استقبله
بيا هله ومية هلا
بكربله رجعت بدر
ورغم ما حيدر رجع بأيامه
عاد اله الطف بعظيم آلامه
خاف ابن ملجم يرد للهامه
وترجع بلايا علي ايتامه
بوليده خايف ينغدر
حيدر ..
ومنين اله بعده صبر
حيدر ..
طبرته اترد طبرتين
وينهدم ركن الحسين
حيدر ..
ـــــــــــــــــــــــــــ
القصيدة الثانية
يا مـاي وتبدّه طـــولك وغــــاب
وانه الردتك تهيل اعليه التراب
اويلاه يالاكبر .. اويلاه
ـــــــــــــــــــ
نجيب الصبر الهــــا هذي منين !!
حين الصاح الاكبر والـــدي ويــن
عكس الصوت ويلي راح الحسين
آه شخلّى بالمعصوم المصاب
اويلاه يالاكبر .. اويلاه
ــــــــــــــــ
من ظهر المهر للگـــــاع من طاح
على وليده الامــــام بيا اسم صاح
صاح بصـــوت يا زينب علي راح
بده توّه اليتم حامي الحمه انصاب
اويلاه يالاكبر .. اويلاه
ـــــــــــــــــ
بطوله تمدد وناداها ويــــــلاه
يا زينب مشــو كل اهلي وياه
اصرخ يا محمــــد لـــو علياه
لو يا يمه ردو عالضلع باب
اويلاه يالاكبر .. اويلاه
ــــــــــــــــ
هوه بصفه يشمـــــه بأخر انفاس
ولگاه من كل كتر بالحافر انداس
صاح بصــــوت احضرنا يعباس
حيلي انهدم شيل ابني من التراب
اويلاه يالاكبر .. اويلاه
ــــــــــــــــ
ارد ابيش لامه شلــــون بيه
لساه بالمخيــــــم تدعي هيه
الهـــي بالحسين اترده اليـــه
بشيبة والده رجّعلي هالشاب
اويلاه يالاكبر .. اويلاه
ـــــــــــــ
صاح بصوت يَمّه وصفگ ايديه
من كثر الخيـــول الداست عليه
لو شفتيه يليـــلى ما تعـــــرفيه
شما احسب جروحه يضيع الحساب
اويلاه يالاكبر .. اويلاه
القصيدة الثالثة
ابتده دور الهواشم
من نزل بأمر الله قادم
صاح الاكبر بالملاحم
آنه حيدر ..
ــــــــــــــــــــ
واحد لواحد يناشد من نزل
ها علي ؟ لو مو علي هذا الـ حِمل ؟
ناده آنه الموت الاحمـر للسأل
بسيفي اگطع دابر الشك والجدل
انتهى وكت المراحم
من بده براس ( ابنَ غانم)
صاح الاكبر بالملاحم
آنه حيدر ..
ــــــــــــــــــ
اي علي الكل الحچي بهالصيحه كف
من زئر بيها عركَها الحومه جف
نشّف ارياگ العــده لمن خطف
وصاحوا احنه بكربله لـو بالنجف
ذني من حيدر علايم
منّه محد يلگه عاصم
صاح الاكبر بالملاحم
آنه حيدر
ــــــــــــــــــ
هذا بسملة الهواشم والها طب
الزلزله الطوفان بيده وكل غضب
خازن النار وحميم اعليهــا صب
استعجلت امر الله بيه هاي الرگب
لكل ظهر بالحومه قاصم
بس اله ولاهله المغانم
صاح الاكبر بالملاحم
آنه حيدر
ــــــــــــــــــــ
استعجلوا بيه حيدره ولمّن ظهر
ابتده طحن الرحى وين المفر
هذا هذا الما يخلّي ولا يَذر
سيفه مالك طيـّح اعليهم سقر
صاعقه تهشّم جماجم
من دخل ابن الفواطم
صاح الاكبر بالملاحم
آنه حيدر
ـــــــــــــــــــ
هذا حيـدر للمعارك من يرد
بالرگب سيفه نزل يذبح يحد
يخلّي ملك الموت صافن من يهد
تكفّه بيّه يگلـه لا تبـذل جهد
آنه ناهي وآنه حاكم
والمنايا بچفي صارم
صاح الاكبر بالملاحم
آنه حيدر ..
ــــــــــــــــ
تعليقات
إرسال تعليق