صَفَر شَهْر المَناحه للشاعر كرار حيدر الخفاجي
صَفَر شَهْر المَناحه دَمعه دَمعه اعله الغَوَالِي
يـعَـظّـم الله أجْـرَك يَالتنُوح ابْـهَـاللـيَـالِـي
الگلُب يشتَد نَحيبه مُصيبه اتجُر مُصيبه
ــــــــــــــــــــــــــــــــــــــــــــــــــــــــــــــــــ
ابْـهالليالي
مِن صَفَر تبدِي المُصايب و البَلايه
ويلي ويلي
انفِتحَت ابْـغرّة صَفَر بَاب الرَزَايه
يامُصيبه
نَوّخ ابْـشَام الحزِن رَكب السَبَايه
هذي زينب
وَاصِلَه الدَار الغرُب و ابْـلَا حِمَايه
الشَهَر يجرَح گلُبنه لو هِلاله ايهِل عَلينَه
وَسَف ظَعن المَكارِم بالخرابه امْگعّدينه
تجِي زينب غريبه مُصيبه اتجُر مُصيبه
ــــــــــــــــــــــــــــــــــــــــــــــــــــــــــــــــــ
يارزيّه
تجرِي بالخَامِس صَفَر هَاي الرزيّه
بالخرابه
فوگ رَاس احسين مِن مَاتت رُقيّه
هيّه طفله
و الطفِل مِن حگّه يشتاگ الأَبَـيَّـه
يارُقيّه
نمتِي لو مِتِّي اعله رَاس ابن الزچيّه
عَلي السجّاد اخوها نَادَه گوموا و وَخّروها
يگلهم مَاتت اختِي و هيّه هَسّه يَم ابوها
رُقـيّـه يَـالـحَـبـيـبـه مُصيبه اتجُر مُصيبه
ــــــــــــــــــــــــــــــــــــــــــــــــــــــــــــــــــ
مَاكو رَاحه
تحدث ابْـسَابع صَفَر شِدّه اعله شِدّه
يامُصيبه
الإمام الحَسَن ليش اتسِمّه جُعدَه
ايظَل يعَالِج
يقذِف ابْـوَسط الطَشِت ياويلي چَبده
و هوّه مَيّت
مَا رِضوا ينحفُر گبره ابْـقرُب جَدّه
يَـعيني ابْـهالمُصيبه دَمعه مِن دَم سِيلي سِيلي
على سَيّد شَبَاب الجَنّه أصرخ ويلي ويلي
مِحَن حصلَت عَجيبه مُصيبه اتجُر مُصيبه
ــــــــــــــــــــــــــــــــــــــــــــــــــــــــــــــــــ
يَامَدامع
كون بالسَابِع عَشَر تِتفجّر اعيون
ياجَرحنه
مِن يسِم چَبد الرِضا الكافِر المَأمون
الله يلعَن
كِل بَنِي العَبّاس و المَا وَفّوا اديون
يَاحقدهم
شوف چَم مَلعون خَلَّف بَعدَه مَلعون
يحِق لِيْ ابْـهالرزيّه اعله الرِضا دَمعي أسيله
و بَعَد أنصُب مَجالس و الطُم و أجزَعْلِي ليله
مُصَايبنه رَهـيـبـه مُصيبه اتجُر مُصيبه
ــــــــــــــــــــــــــــــــــــــــــــــــــــــــــــــــــ
يَاهَضيمه
مِن صَفَر لمّن يمُرنَه يوم عشرين
بِيه عَادَت
زينب ابيوم اربَعين و تهمِل العين
بَعد هَاليوم
ابْـكربله للگبر رَجْعَوا رَاس الحْسين
هَاي زينب
ليش تسأل عن گبر رَاعي العَلَم وين
مَرَاسِم هالزياره ابْكربله وَاجِب حَييها
بِدَه هَاي المَرَاسِم جَابر الأنصاري بِيها
ابْـگلُب يسعَر لهيبه مُصيبه اتجُر مُصيبه
ــــــــــــــــــــــــــــــــــــــــــــــــــــــــــــــــــ
و ابْـختامه
الثامن و عشرين مِن شَهر النوايب
عِدنه مِحنه
انشوف ابو الزهراء بالتربان غَايب
يامُحمّد
ميّت و مَليان گلبك بِالمُصايب
و انته ميّت
رَاسَك امن اصحَابَك الغَدّاره شَايب
مُحمّد يامُحمّد يَاجرح عَرش الجَلاله
على امصابك بِچَالَك حتى ربّك جَلْ جَلاله
بِچَه الباري الحَبيبه مُصيبه اتجُر مُصيبه
ــــــــــــــــــــــــــــــــــــــــــــــــــــــــــــــــــ
١٨ / ١١ / ٢٠١٤
كرّار حيدر الخفاجي
تعليقات
إرسال تعليق