القصيدة: يا رحمة الله
الرادود: مُحَمَّد الجنَّامِيْ
الشاعر: وسام الشويلي
~~~~~~~~~~~~~~~~~~~~~
يا رحمة الله مُصابك فِجعنه
عَنْ يا رزيّه يخبرك دمعنه
هذا علي بمصيبه عفته و هضيمه
و ابنّيتك الحبيبه صارت يتيمه
عَنْ يا رزيّه يخبرك دمعنه
~~~~~~~~~~~~~~~~~
اشلون نحچي امنين نبدي
و هذا حادي الموت يحدي ابروحك اليوم
ابفرگتك ذايب گلبنه
يا أبونه ما حسبنه تموت مسموم
انته عطفك ماكو منّه
فوگنه خيمة محنّه تزيل الهموم
اشلون اذا شفناك طايح
يعني كلشي اوياك رايح كلشي مهدوم
انته ابونه الترسنه ابتسامه
لمّن نودعك نودع السلامه
يا خيمة المحبّه ابقى ألنه خيمه
و ابنّيتك الحبيبه صارت يتيمه
عَنْ يا رزيّه يخبرك دمعنه
~~~~~~~~~~~~~~~~~
الدنيه بعدك تصفه غابه
و البشر تصبح ذيابه تدوّر اطماع
بحر هاج الوكت بينه
شلون مسراها السفينه التفگد اشراع
لَوّن عن الحال تسأل
كلشي بغيابك تبدّل و الفرح ضاع
الك نعرض يا جريمه
يا رسول الله هضيمه علي ينباع
طحنه ويه وادم ذممهم رخيصه
قلّه قليلة اعله دينك حريصه
چم فاجعه دهتنه وا شچم جريمه
و ابنّيتك الحبيبه صارت يتيمه
عَنْ يا رزيّه يخبرك دمعنه
~~~~~~~~~~~~~~~~~
علي شحاله يهيچ فرگه
بعد مثلك وين يلگه ظهره مكسور
للگبر نَزّلَك بيده
دفن روحه و دفن عيده گلبه مجمور
بعد يالدنيا اشبگاله
عرف وضعه و عرف حاله بعيش مغدور
كلشي راح يصير ضدّه
من دمعته مثل خدّه گلبه محفور
بگد ما تريده و تحبّه و تِقّدره
يكرهونه بعدك نواصب تغدره
وادم اجت تنكره ما الها قيمه
و ابنّيتك الحبيبه صارت يتيمه
عَنْ يا رزيّه يخبرك دمعنه
~~~~~~~~~~~~~~~~~
فاطمة الحاسبها روحك
ليش عفت الها جروحك يا جرح طاب
تراب گبرك بعده اخضر
والضلع منها تكسّر دفعوا الباب
بسمك تنادي وضربها
الباب بي يعصر گلبها والضلع عاب
تون گوه اتجْر نفسها
طاح محسن من رفسها والگلب ذاب
سوط ابمتنها و جمر يچوي بيها
كل ما ظربها تشاگف بيديها
بسمك اذا تنادي تسمع شيتيمه
و ابنّيتك الحبيبه صارت يتيمه
عَنْ يا رزيّه يخبرك دمعنه
~~~~~~~~~~~~~~~~~
فاطمة شگد لوّعوها
يا مُحمَد يمنعوها لمّن اتنوح
ذبل بفراگك غصنها
لو شفتها تگول چنها طير مذبوح
اشحال حيدر لو نظرها
تمشي و امحدّب ظهرها چن بلا روح
وي علي تسولف امدنگه
خايفه يعاين ويلگه بخّدها الجروح
هذا وضعها و علي هذا حاله
من يمشي صورة هضيمه ابخياله
هالدنيه ينظرالها بعيونه هيمه
و ابنّيتك الحبيبه صارت يتيمه
عَنْ يا رزيّه يخبرك دمعنه
~~~~~~~~~~~~~~~~~
~~~~~~~~~~~~~~~~~
قصيدة ▪︎[ يارحمة الله ] ▪︎اداء | محمد الجنامي ▪︎كلمات | وسام الشويلي ▪︎المكان | العراق - النجف الاشرف ▪︎ عزاء هيئة الزهراء للعزاء المركزي ▪︎ليالي شهادة النبي ص 1443
تعليقات
إرسال تعليق