📜قصيدة : لاتسألني عالفركه
🎤الرادود : مرتضى حرب
🖋الشاعر : ابو معصومة الفريجي
~
يابويه من تسألني عالفركه
انه اكثر من الخيمه محتركه
اكعد جبتلك شربة اميه
بلكت تكلي شبيه مابيه
بويه .. بويه
~~
الماي من جابوهه اليه
ومن جهبته اتعذبت
وجبته يحسين واجيت
ما اشرب كبلك كلت
بين هاي الجثث كلها
يمك بساع اوصلت
عطرك الجاباني يمك
ماتعبت ودورت
يابويه من بين الجثث كلها
المدلله اتحن لليدللها
جنك تناشد هيه مو هيه
بلكت تكلي شبيه مابيه
بويه .. بويه
~~~
ضام جفك خاف اشوفه
وعلى الخنصر تنسأل
حته لو مكطوع اصبعك
امسح ادموعي التهل
انه جيت ارد اشتكيلك
كلت هسه الكا عدل
كلبي ماينطيني اعوفك
بس شسويله الحبل
يابويه ضلت عيني بعيونك
عن اغلى شي عندك يبعدونك
بهالروحه ماترهم بعد جيه
بلكت تكلي شبيه مابيه
بويه .. بويه
~~~
الطفله اذا يهضمها واحد
تبقى دمعتهه تصب
تشتكي تروح الابوها
وبالاخص من تنضرب
شنهي رايك بالخذوهه
تناشغ بهذا الدرب
بعينها تموت البراءة
التمشي وي وادم غرب
وبروحي ماتت جلمة البابا
مو حكة كلبي ايزيد اعتابه
عد الهواشم طفله مسبيه
بكلت تكلي شبيه مابيه
بويه .. بويه
~~~
هاي دنيا شلون دنيا
البيها جسمك منسحك
بيها كل احلامي ماتت
من اهد ذاك الحرك
بويه مامتعوده اعوفك
ليش صارت نفترك
حيل مشتاكه الحنانك
والرمح ما ينشبك
وعيونك الماعافت عيوني
من اتدنه يم راسك يضربوني
ماكال واحد هاي علويه
بكلت تكلي شبيه مابيه
بويه .. بويه
~~~
راح اروح وروحي يمك
وامشي عنك بس جسد
خاتمة حزني الخرابه
خذت من راسك وعد
اسياطهم نزلت عليه
وما احس بيهن ابد
شنهي اكثر من فركتك
توجع ابنيتك بعد
يابويه لعيونك يمشنها
مسبيه بنتك بس ولاجنها
مادام عطرك تارس الريه
بلكت تكلي شبيه مابيه
بويه .. بويه
°°°°°°°°°°°°°°°°°°°°°°°°°°°°°°°°°°°°°°°°°
تعليقات
إرسال تعليق