خلصت ياحرامات .. راحت احلى ساعات .. من عمر الخدم
يشبه ساعة الموت .. الشارع بلا صوت ..ولا رفة علم
خلصت احلى الايام
العوده الكم يخدام
خلصت
..
باچر طريق اهل العشك من الصبح وحشه
وما نركض نشيل العمر وللزاير انفرشه
يافشلة الخادم لمن ..يوكف يجي ..ويفتحها ذرعانه
والدرب خالي من البشر ..محد يمر.. الفاجعة اهنانه
چلمة عساك ومـ اتعبت .. باچر تظل .. خجلانه بلسانه
باچر تطلع الروح ..عند الصوته مبحوح ..من كثر الحچي
الهلا بالزاير يصيح ..بعتبة موكبه يطيح ..من كد البچي
للبلخدمه ما نام
العوده الكم يخدام
خلصت
الصبح يخلص بس بعد شيخلص المغرب
تلكاه مثل فاكدله ابن وينوح المعزب
يسأل يظل بصاحبه .. صارت صدك ..لو آنه متوهم
اتلگه زاير بالهلا .. لو خلصت.. هالليله ما نخدم ؟
بحزامي انام من التعب ..وتعودت ..آنه اغفه متحزم
آنه محضر الماي ..شو محد عّلي جاي ..ما واحد يمر
فاكد ذاك التراب ..المن اجدام الاحباب ..الاحلى من العطر
للظل گلبه محتام
العوده الكم يخدام
خلصت
.....
باجر صبح مابي هلا مابي ركض خادم
وچلمة علي وياكم كضت ماتسمع الوادم
آه شكبر كسرة ابو .. الموكب لمن .. مايلگه مشايه
يطلع ويوگف بالدرب .. مايقتنع ..زوار ما جايه
بالله شيصبره الچان امس ..من الفجر ..يشتم هوا الرايه
طريق بلايه زوار.. يشبه طبة النار .. يهدم بالگلب
حلاتك وانته تعبان ..تركض وي الاذان ..توكف بالدرب
يل فاركتو الأعلام
العوده الكم يخدام
خلصت
.....
باجر صدك يبدي التعب وتبين ايامه
كسرة ظهر باچر تجي للينزع احزامه
الخلصهه ركضات وهلا .. باجر يحس.. مابيده كل حيله
اتكتله من تحجي اله ..ماكو مشي .. افراشك بعد شيله
ساعاته تخلص ع الدرب.. بين الدمع ..والصفنه الطِويله
من ما يلگه رايات ..چن واحد اله مات ..لا واكثر بعد
الخادم راحته بهاي .. من يتعب لمشاي .. ويتعب لو كعد
يل شديتو الحزام
العوده الكم يخدام
خلصت
....
لتگله يشرح حيرته المعزب الحاير
شلونه چا هو بعد الفارگ الزاير
ذاك العمود البي فزع ..يسد الدرب .. من توصل اعزازه
من خلصت ايام المشي .. اعليه انتچه .. وانگلب عكازه
طاسه الماي الفارغة .. بيده ارجعت.. چن شايل جنازه
هوسات العشك وين ..فارغ درب الحسين . ياحسرة وقهر
نتنطر اله نعود ..صفر يمته يجي اردود ..نحسب جم شهر
نظل نتنطر العام
العوده الكم يخدام
خلصت
....
حسين طالب السماوي
#الاربعين
تعليقات
إرسال تعليق