القصيدة: أبْچَن يَالعْيوُن
الرادود: مُحَمَّد الجنَّامِيْ
الشاعر: كرار حسين الكربلائي
~~~~~~~~~~~~~~~~~~~~~~
أبْچَن يَالعْيوُن عالما يرجعون
گلـبي صاح كلشـي راح
مِن وَدِعُوني احبابي
~~~~~~~~~~~~~~~~~~~~~~
أحنّيت .. لايّامي الگبل ما بيها لمعه
ياريت .. يرجع كلشي بس الراح شيرجعه
ظليت .. اذوبن مثل خيط و نار بالشمعه
ونّيت .. ونيني خايفه من الشامت يسمعه
امتعّبني الفراگ لحبابي اشتاگ
شگد بچيت وانحنيت
مِن وَدِعُوني احبابي
~~~~~~~~~~~~~~
دنياي .. كسرت خاطري و ما رحمت بحالي
ويّاي .. ما نُصفت ابد ما ريّحَت بالي
الماي .. كلما شفته شفت چف اخو غالي
بضماي .. اظل لآخر نفس ماريد چتّالي
كل ماشفت جود اتذكّر ازنود
عالفرات حيلي مات
مِن وَدِعُوني احبابي
~~~~~~~~~~~~~~
يا ناس .. عله متون الشريعه تبدّت سنيني
عبّاس .. لو موجود محّد يذبح حسيني
بحساس .. اخوي من الفرات ايگلّي عذريني
عالراس .. عمد طايح و مطفيه بسهم عيني
ناديته معذور يا بدر البدور
لا امان لا حنان
مِن وَدِعُوني احبابي
~~~~~~~~~~~~~~
شيفيد .. شيفيد الصبر للفارگ احبابه
ميهيد .. جرحه الفگد غالي وطوّل غيابه
شيريد .. من عمره الحبيبه سكن بترابه
و ابعيد .. عنه الفرح بس دموعه سچابه
ودعت الاحباب مابين الاتراب
گلبي ذاب بالعذاب
مِن وَدِعُوني احبابي
~~~~~~~~~~~~~~
چم آه .. شفت بدنيتي من فرگة اخواني
ويلاه .. مسبيّه الوكت للشام وداني
والله .. السبي جيّت موتي خلاني
انعاه .. الما بچّاني عمره شكثر بچاني
يفراگ الحسين موَّتني مرتين
عالغريب بس نحيب
مِن وَدِعُوني احبابي
~~~~~~~~~~~~~~
~~~~~~~~~~~~~~
قصيدة ▪︎[ ابچن يالعيون ] ▪︎اداء | محمد الجنامي ▪︎كلمات | كرار حسين الكربلائي ▪︎المكان | العراق - بغداد - الحسينية ▪︎ عزاء مضيف ابو الفضل العباس - ع - ▪︎ليلة 18 شهر محرم الحرام 1444
تعليقات
إرسال تعليق