ميمر // لقاء الامام زين العابدين عليه السلام مع جابر الانصاري رضوان الله عليه يوم الأربعين
ياجابر هنا بالسيف ذبحوا حبيب الزهره
.....
ياجابر منين ابدي وجروحي هواي
بعاشر محرم ريت حاضر ويّاي
تشوف المصايب راسك يشيب بهاي
من تنظر بصدر حسين. صاعد شمر حز نحره
......
هنا ذبحوا حسين الغريب العطشان
بلا دفن ضلّ مگطّع عله التربان
ياجابر واصعب وشد موقف چان
مخضب بدم نحر حسين. للخيم من رد مُهره
.....
ياجابر هنا بالحوافر سحگوه
وراسه برمح مخضوب بالدم رفعوه
بحرّ الشمس مطروح ظل ما دفنوه
الف وتسعميت جروح ما بين طعنه وطبره
........
وهنا يجابر بالخيم شبّوا نار
وفرّن بنات المصطفى زغار كبار
وانه العليل امن المرض حيلي انهار
انظر فرار النسوان. وما اگدر اطفي الجمره
.......
ياعم يجابر كربله هاي وذاك
عباس عمي عالنهر طاح هناك
ضحّه بچفوفه ودم وريده لمولاك
لحسين وفّه العباس. بچفوف اديه وبعمره
......
وهنا يجابر بالسيوف اتوذّر
اليشبه مُحمّد بالوسامه الأكبر
وبن الحسن جسام ضحّه المنحر
متمسّك بعمّه حسين. نال الشهاده بزغره
......
وهنا يعم چتفوا ادينه الظلّام
بنوگ السبي للكوفه رحنه وللشام
واليوم اجينه لكربله بالآلام
زوار ابواليمه حسين نجري الدمع يم گبره
سيد زيد الفحام
_________
#زيارة_الأربعين
يحله المشي لحسين
ولصاحب الچفين
للغاضريه. للغاضريه
.......
يالله شدّو حزامكم. للمشي بجدامكم
خل ترف گدامكم. راية حسين
يالله يالوفايه. لكربله مشايه
ما تطيح الرايه. راية حسين
اذّن آذان المشي بتكبيره
يالله يازوار يهل الغيره
مشي نمشي للربينه بخيره
نجدد عهدنه وياه
اي والله ما ننساه
للغاضريه. للغاضريه
..........
المهدي يمشي وياكم زاير ويـرعــــــــاكم
يفــرح ابممشــــــاكم صاحب الثار
شيعتـه وانصـــــــاره. من يداعي بثاره
بيّنت اخبــــــــــــــاره صاحب الثار
اليمشي خطوه ينكتب من ربعه
لو ندب بسمه يمهدي يسمعه
لو تعب بيده الامام يدفعه
كل زاير الينخاه
ينسه التعب والآه
للغاضريه. للغاضريه
..........
حسين هاي ايـــــامه. وبالدرب خدامه
تحزّمـوا بحـــــــزامه لليزورون
بالمـــــــــواكـب هايه تخدم المشايه
تنـطـي كلشـي الغايه لليزورون
عالدرب هاي المواكب عامره
بكلشي يالزوار الكم حاضره
الكم امن العام هيه امناطره
خدام ابوالسجاد
سفرتها ماي وزاد
للغاضريه. للغاضريه
..........
يالله يا عشّـــــاگه. حسين يسوه ملاگه
نار تچوي فــــراگه يالموالين
بربعينه انعـــــاهد. عالعهد ونجاهد
حسين هوه القائد يالموالين
ما يتعّبنه المشي شمحلاته
نواسي زينب اخته وبنيّاته
رجعن امن الشام مسبيّاته
يبچن دمع وجروح
لوالدهن المذبوح
للغاضريه. للغاضريه
سيد زيد الفحام
_____________________________________________
قصيده كعده لرجوع السبايا الى كربلاء
زينب رجعت بيا حال يحسين. ما تدرون بيها
تشكي جروح وآلام
بين الكوفه والشام. ما تدرون بيها
.........................
رجعت امن الشام زينب. تعثر بجدم المصيبه
چانت ابعــزّه ومهــــابه. هسّه مسبيه وغريبه
جابت وياها اليتـــــامه كل طفل يجرح نحيبه
مهضومه من درب السبي
بضعة وصي وابنة نبي
ياوسفه يسبيها اجنبي
زينب الحره النجيبه
من حبل السبي اختك يعباس. مجروحات اديها
نظرات العدو سهام
بين الكوفه والشام. ما تدرون بيها
..........................
وصلت بيا حـــال زينب. من بعد غيبة الطويله
تصيح يبن امي وحبيبي آنه ياخويه العقيله
وين گبرك خويه وينه. تصيح والمدمع تسيله
جاوبني ياضي البصر
ردّيت من درب السفر
عذبني يحسين الدهر
بهضم ما يحصل مثيله
الموت الموت ارحم للمَرَه هواي. من تفگد وليها
اعظم وصعب ايام
بين الكوفه والشام. ما تدرون بيها
..........................
عالگبـر ذبّت نفســــــــها. تشكي بدموع الرزيه
خويه ريت تشوف حالي من عفتني اشصار بيه
يالجبتني بهيبـــه للطف. رحت من بعدك سبيه
يحسين عفتك عالثره
ضلوعك يخويه مكسّرَه
رديت لن بس مگبَــرَه
گبوركم بالغاضريه
اطفالك جبتها بس رقيه لا تنشد عليها
طفله وبيد ظلّام
بين الكوفه والشام. ما تدرون بيها
..........................
خويه ريت الگبر ينفك. ونزل بلحدك يغالي
الدنيا ما تسوه بغيابك. عذّبت يحسين حالي
اكعد اشكيلك مصايب. خويه وجروح الليالي
تقبلها يا نبض الگلب
تاليها للديوان اطب
وتشمّتت بيه الغرب
شمتوا بالماعدها والي
زينب بت علي جبناها ييزيد ليك مچتّفيها
بس ما طخّت الهام
بين الكوفه والشام. ما تدرون بيها
..........................
راحت لكافل خدرها. للنهـر زينب حزينـــــــه
تگلّه يا عباس تدري. من طحت خويه انسبينه
عالهزل للشام رحنه. والشمر حادي الظعينــه
عباس ياحامي الظعن
ردّينه بجروح الزمن
انهض وردنه للوطن
خويه يم گبرك اجينه
انهض يراعي المرجله
ردّينه خويه لكربله
تسأل عليك العايله
ظعنك منو اليتكفّلَه
كل الحرم متعلعلَه
آنه يا عباس زينب. امن الحبل مجروحه اديه
#سيد_زيد_الفحام
___________________________________________
نزلة / عگيلي لزيارة الاربعين
مشايه انواسي المسبيه
......
مشايه ونرفع رايتنه
انواسي الماذلّت غايتنه
زينب آيتنه وهيبتنه
ما ذلّت زينب ثوريه
.....
زوار حسين اتعنّينه
وينه الرايد يمنع وينه
خل يدري المايعلم بينه
ماضينه اشرف من ماضيّه
.....
زوار حسين ومانتعب
لو نتگطّع فدوه لزينب
خل كل العالم يتعجّب
بزوار حسين وطاريّه
......
زوار حسين الوفّايه
من كل العالم عنّايه
لحسين اتعنّت مشايه
مجنونه بحبه وممليّه
.......
عالموعد نوصل للحضره
نزور حسين ونشتم عطره
شيعه ونلتم كلنه بگبره
وحاجة كل زاير مگضيه
......
لاشك وي اسماء انصاره
حسين يسجّل كل زواره
معصوم ويكرم خطّاره
يشفي المرضى ويقره النيّه
.......
ما بين العباس وبينه
جنّة وبالجنّة ارتاحينه
شنتمنّه ونطلب ينطينه
ويرعانه بروحه المرضيّه
سيد زيد الفحام
______________________________
قصيده في رجوع زينب والسبايا يوم الاربعين
يخوتي ما دريتو بحالي
يخوتي ماكو من يبرالي
............
والله من يوم العفتكم ما شفت اي راحه
گلبي ذايب من فگدكم ما تطيب جراحه
والفـگـد اهـله واخوته ما تفيـده نياحه
حالي حال الطير يوگع من يموت جناحه
سبوني وانه زينب اني
سبوني للغرب يخواني
..........
ليكم خواني رجعنه والسبي اذّانه
خويه يبن امي رقيه ما اجت ويّانه
بالخرابه هناك ماتت خايفه وحزنانه
شافتك بالطيف يمها شبگتك لهفانه
رقيه بالغرب عفناها
رقيه خويه ما جبناها
.........
خويه يم گبرك گعدنه ننحب ونشكيلك
حسين جاوبنه يخويه ياولينه دخيلك
نشفت دموع النواظر خويه دم نبچيلك
يامصيبه النّبدي بيها ياجرح نحچيلك
مصابك نبچي دم خلّانه
مصابك باليسر أذّانه
............
وينه وينه اللي كفلنه عالنهر ما شوفه
وينهن دلوني بالله ارد اشوف چفوفه
جيت من سبي وعذابي بالظعن ملهوفه
بالترب مدفون جسمه والسبايا اطّوفه
كفيلي وفّه كل عهوده
كفيلي گطّعوها زنوده
............
آنه والايتام جينه بالدمع يخواني
ما دريتو الصار بينه من يسر عدواني
آنه باريت اليتامه ماكو من يرعاني
خوفي تتأذون مني لو شكيت احزاني
غريبه بالسبي عفتوني
غريبه حايره بظعوني
...........
والله لو بيدي يخوتي يمكم اگضي سنيني
شلون ارد لرض المدينه بغيبتك يحسيني
وانت ياعباس خويه جمرتك تچويني
منهو بغيابك كفيلي يالگمر حاچيني
وداعاً للوطن ردّينه
وداعاً بس حرم ظلينه
سيد زيد الفحام
__________
تعليقات
إرسال تعليق