القصيدة: لو تِتْعبْ رِجليْنيْ
الرادود: مُحَمَّد الجنَّامِيْ
الشاعر: راضي الفيصلي .. .. ..
~~~~~~~~~~~~~~~~~~~~~~
لو تِتْعبْ رِجليْنيْ
عَبّاسْ
امشيلك بيديني
عَبّاسْ
عَهدي بكل اسنيني
عَبّاسْ
.. .. ... ..
~~~~~~~~~~~~~~~~~~~
ها يعبّاس الك جاي گطعت الدرب
امشي عالجمر مو صعب هذي تضحيات المحب
لو تفرشني اجروح//٢
ازحف يكون عله الراس اجي عالوعد
بدمومي احدّد عهد و ابجدمي ادگن وتّد
و ابسط يمْك الروح//٢
گالوا الصيف هوهَ الحار گلت فدوه اله
حافي امشي مومشكلة لو چان الوطن كربله
ريت اوصلّه مذبوح//٢
اوفي اعهد من اسنين واجيلك حَبي
واتلگله بنات النبي ردّن من دروب السبي
سهم النايبه ايلوح//٢
ويّاهن امشيلك
عَبّاسْ
اشكيلك و ابچيلك
عَبّاسْ
بس خادم سميني
عَبّاسْ
~~~~~~~~~~~~~~
تسمع الصوت ينادك يحادي الظعن
گلبك اوسع من الصحن غربة وانته النه وطن
چنك حامي الدخيل//٢
هاي الحشود يبو الجود اجتك زحف
رايات الهواشم ترف گد الدنيه ما تنوصف
جرّت جرّة السيل//٢
راف اچفوف منارات چفوفك علم
قدوة للوفه والشيم واگف يبگه عندك سهم
شاهدلك يالچفيل//٢
ابهبّة الريح صده ايصيح مثل وگفتك
تعله وما هوت رايتكرافعها عمد غيرتك
لاتوگع و لّتميل//٢
لو احسب خطواتي
عَبّاسْ
احسبها ابدمعاتي
عَبّاسْ
خطواتي تبچيني
عَبّاسْ
~~~~~~~~~~~~~~
وداعة احسين والاكبر علهكل عمد
صوت آهلًا وسهلًا صعد لا گِدر المواكب برد
وايرحّب بالضيوف//٢
تگصر ادرب بالجدام المشه بالعشگ
شمعه وللدرب يحترگ بس هاي المحبه صدگ
حبك بيها موصوف//٢
الحب الحسين يعبّاس طحت عالنهر
تِسلم غيرتك يا گمر فوگ الرايه صارير وذر
مو بس تنطي اچفوف//٢
جانب الماي يوفّاي تعلّم درس
للرايد معزة نفس بالدم الشرف ينحرس
ويذبح بالسيوف//٢
اشتمك بانفاسي
عَبّاسْ
يا مالك احساسي
عَبّاسْ
جايبني موديني
عَبّاسْ
~~~~~~~~~~~~~~
هذا بس يوم حسبناه نعدّه ابدهر
واحنه نمشي اعله الاثر چنه المهدي بيها حضر
ماشي بهالمسيره//٢
انتابع اوياه نماشيه نحس خطوته
بكب خطوة اثر دمعته نار وتلتهب حسرته
ايتابع ديره ديره//٢
ابجاهك انريد يصنديد عنايه ونظر
من المهدي المنتظر لا يدنه المشينه خطر
واحنه شعدنه غيره//٢
شارتك سيف يالچفيل وقايه و حمه
باب الحضرتك مرحمه بي نشتم عطر فاطمه
يا بدر العشيره//٢
محلاها ابأعتابك
عَبّاسْ
لو نسجد يم بابك
عَبّاسْ
بس يمك خليني
عَبّاسْ
~~~~~~~~~~~~~~
▫️قصيدة ▪︎[ لو تتعب رجليني ] ▪︎اداء | محمد الجنامي ▪︎كلمات | راضي الفيصلي ▪︎المكان | العراق - ميسان - حي القاهرة ▪︎ عزاء حسينية الحاج عبد الزهره الفرطوسي ▪︎عزاء ليالي شهر محرم الحرام 1444
تعليقات
إرسال تعليق