القصيدة: أخْذْتي فَرِحتِي
الرادود: مُحَمَّد الجنَّامِيْ
الشاعر: حمزة السماوي
~~~~~~~~~~~~~~~~~~~~~~~~~
أخْذْتِي فَرِحتِي و حَياتي
وَ گلبي و روحي يَدِنْيـه
قَريْبِي و حَبِيِبْي بسِكوته
تِحْچِي جْرُوحي يَدنْيـه
بَعْد مَا شُوفْه يَمْي
چِبِيْر و رِيْحَة أُمّـي
يَدِنْيـه .. يَدِنْيـه
~~~~~~~~~~~~~~~~~~~~~
يَدِنْيـه رَاجع ودافن اعز واحله سِنيني
نِفس ما باقي بيه وباقي بيه بس ونيني
اباوع بالوحوه وماكو بيهم ماي عيني
دِفنت الچان بالنظرات يفهمني وافهمه
دِفنت الما اسولف سالفه إله و بيها اسمه
الهَوة ما شامه چنت الحَسَنْ يوميه اشمه
يَدنْيه شطالبتني ويه العزاز
اخذتي الشوفته بكل ليله اعتاز
ومن دون البشر خليتي الحسين
يـوميـه بـگلـب طـالعلـه جـنـاز
حسافة وسافة شسولف عنهم
شحچي قليلة
الاحبهم بتربهم اخوي وياهم
شبچي قليلة
وگف ما يمشي دمي
چِبِيْر و رِيْحَة أُمّـي
يَدِنْيـه .. يَدِنْيـه
~~~~~~~~~~~~~~~~~~~~~
رجعت ايدي ورة ظهري دفنت الچان كلشي
اليمشي بدفنت المحبوب شيب براسه يمشي
من الصدمه والتفكير ما رف حته رِمشي
يا دنيه رگضتي عالحَسَنْ ما شفتي غيره
ما دافن اخو بترابه دافنلي عشيرة
بعد الدار وجهة وراح وجهي المن اديره
ولا اذكر ولا چانت بالحساب
آنه والحَسَنْ بيناتنة اغياب
اول مره يسكت من احاچيه
وشيرجعه الدفنته چوه التراب
بحرگتي بدمعتي انادي كافي
ارجع يخويه
بشعوري ضروري اريده يدري
ويسمع يخويه
جبل شيطيح هَمي
چِبِيْر و رِيْحَة أُمّـي
يَدِنْيـه .. يَدِنْيـه
~~~~~~~~~~~~~~~~~~~~~
مالحگت اعيش وياه بالباب انكسرنه
چنهة امس أُمّي اتنوح نسمعهة بزغرنه
وهذاك اليوم چنه اطفال وشبسرعة كبرنه
ومن انعصرت أُمّي هناك ظل لازم اديه
گدامي وگف للنار لا توصل عليه
يَدنْيه كون اگعده يشوف فگده اشسوه بيه
ولا اندل طريقي برَجعتي منين
رحيلي الچان عيني وتارس العين
وچانت بإختصار صار العِشرة وياه
الحَسَنْ من الهوة يخاف اعله الحسين
عِضيدي وريدي غيابه هَدم
حيلي عليه
شيرجهة واسَمعة سِوالف هِجمت
ليلي عليه
رحيل الخوه يِعمّي
چِبِيْر و رِيْحَة أُمّـي
يَدِنْيـه .. يَدِنْيـه
~~~~~~~~~~~~~~~~~~~~~
راح اگضي بدمعتي الليل وجه الغالي غايب
اعتب عالوكت مرات لو عالدنيه اعاتب
مكتوبه الك يحسين تدفن بالحبايب
وكلما تطلع الحسرات روحي وياهة تطلع
صوت الحَسَنْ من اليوم مراح ابقه اسمع
ياريت الوكت ياناس بالايام يرجع
ونرد نگعد سِويه نقره قرآن
شيخلص اليل على الفاگدله خوان
وبيه جروح من الحَسَنْ للموت
مو للماي آنه لوجهة عطشان
بزماني اعاني اعيشن بعده
ميت تراني
يظهري يذخري اصيحن وارجع
اسكت تراني
الحسين الفاگد اسمي
چِبِيْر و رِيْحَة أُمّـي
يَدِنْيـه .. يَدِنْيـه
~~~~~~~~~~~~~~~~~~~~~
الحَسَنْ بعده شبقه بالروح ضل بالضيم عمري
تركض كربله والخيل من هسه اعله صدري
اذكره الحَسَنْ من السيف يگطع مني نحري
شما مر الوكت على البال مافد لحظه ناسي
چبده بالطشت بالعين شفته وارد اواسي
بسابع صفر هم بالطشت راح يصير راسي
ردته بكربله من تلتم الناس
يساعدني اعله حزني فراگ عبّاس
بي شاء القدر ولو وحدي ضليت
واضل انهاه لو فوگ الرمح راس
تركني وهجرني بديه دافن
راحة حياتي
اساهر واناطر عُيوني بهجرك
كرهت حياتي
چفني الصار مدمي
چِبِيْر و رِيْحَة أُمّـي
يَدِنْيـه .. يَدِنْيـه
~~~~~~~~~~~~~~~~~~~~~
~~~~~~~~~~~~~~~~~~~~~
تعليقات
إرسال تعليق