أعظم الله تعالى أجورنا وأجوركم بذكرى شهادة نبي الرحمة وحبيب رب العالمين سيدي ومولاي النبي محمد صلى الله عليه وآله.
ظلت يتيمــه فاطمه ... ودموعها سالت دمه
ثاني يتــم هالـلـيلـه مَرهه ...
واثمنطعـش بـعـده عمرهه .. يا زهراء
.......................................................................................................
ليلة حزن كئيبه ... شگد مؤلمه المصيبه
حسرة فگد غريبه ... تأخذ الروح
علّـي بقـت يتيمه ... وتـنـادي يا هضيمه
راح الأبو حريمه ... وظلت إجروح
ثاني جرح توّه إبتده ... من بعد فگد الوالده
وسط الگلب يسعر جمرهه ..
واثمنطعـش بـعـده عمرهه .. يا زهراء
.......................................................................................................
حتى الورد ذبـوله ... من حسرة البتـوله
موقف فقد حلوله ... أسئله هواي
شنهو اليتاني فاطم ... حرمه وزمنهه ظالم
بس الله هوه العالم ... يا هضم جاي
كـــل الوجــــوه إتغيرت .چنهه السقيفه تحضّرت
رسموا مخطط بي غدرهه ..
واثمنطعـش بـعـده عمرهه .. يا زهراء
.......................................................................................................
فگد النبي ومُصابه .. يرحل يظل غيابه
يفتح رحيله بابه ... الكل الأحزان
أم الحسن تناطـر ... باچر تلحگه باچر
باب المنيه حاضر ... يبقه عنوان
عالزهـــره لمــن يـنـدفع .يسقط جنين يطگ ضلع
ملعون كل ظالم عصرهه ..
واثمنطعـش بـعـده عمرهه .. يا زهراء
.......................................................................................................
وحشه إنمله مكانه .. ظل فارغ وحنانه
واليرحل بأوانه ... يجرح گلوب
أمر الله والفجيعه .. مكتوبه عالوديعه
ضيعتهه والله ضيعه .. روحها تذوب
مهضومه عاشت فاطمه..والمشتكى الرب السمــه
رب الـعـرش عـظّـم أجرهه ..
واثمنطعـش بـعـده عمرهه .. يا زهراء
.......................................................................................................
لهذا الحزن علامه ... مرسومه عاليتامـه
ذرية الإمامه ... شاهدوهم
بعمر الورد بعدهم ... لكن ذبل وردهم
ما چنّه طه جدهم ... چنّه أبوهم
دمعاتهم چنهه الضوه ..ينوحون عالهادي سوه
تصبرهم الزهره بصبرهه ..
واثمنطعـش بـعـده عمرهه .. يا زهراء
.......................................................................................................
يالراحـل بمنـيـه ... عن علي والزچيه
واتيتموا سويه ... بهذا المصاب
ضاع الأمل وجوده .. جزّه الحزن حدوده
هاي الليالي السوده .. شتحمل إعتاب
شيفيد وياهــه العتب ..هذا الدهر دهر العجب
يتعمّـــد الفــاطــم كسرهه ..
واثمنطعـش بـعـده عمرهه .. يا زهراء
.......................................................................................................
دين الله هذا نوحه ... ندري محمد روحه
لا ما تطيب جروحه .. فجعة الدين
بحيدر يظل يكابر .. والطبره هم تناطر
عتره فدت مناحر .. بالميادين
عن يا مصيبه ويا جرح ..عتره وگظت سم وذبح
فاطم تناطر مُنـتــظـرهــه ..
واثمنطعـش بـعـده عمرهه .. يا زهراء
.......................................................................................................
خادم محمد وآل محمد
عمار هليل الواسطي
قصيدة في ذكرى إستشهاد الرسول الأكرم محمد صلى الله عليه وآله
بعدك يتيمه بيا حال ..تدري إشجره اعله الزهره
.................................................................................
من غمضت عيونك يسيد الأكوان
واتيتم الدين ونعاك القرآن
ياوحشة الزهره وگلبهه الوجعان
فارغ مكانك تلگاه ..تسچب عليك العبره
.................................................................................
فارغ مكانك والمن تصد العين
لو شافت بفگدك دموع الحسنين
لي وين يمسافر رحيلك لي وين
كل لحظه يالغالي بعام ..والدمعه صارت جمره
.................................................................................
جمر الدمع ما ينطفي وجرح الروح
هيهات يشفه والحمل ظل مطروح
گلب الولي الكرار بعدك مجروح
يصبر الزهره اعله الآه ..بس گلبه بيش يصبره
.................................................................................
يا فاطمه هذا القدر والحكمه
والأمر للباري نفوضه وعلمه
أعرف وداع المصطفى بي لچمه
فجعة حبيب المعبود ..بس هذا ربنه وأمره
.................................................................................
بعدك يغالينه شحصل بالأطياب
ما حفظوا الحرمه التسمّوا أصحاب
دفعوا على الزهره يهادينه الباب
والضلع صابه البسمار ..وطاح الجنين بعصره
.................................................................................
من أضرموا يم دارهه النار شلون
ما فكروا هذي بنت سيد الكون
شيمتهم الأحقاد من يغدرون
رادوا خلافه وخانوك.. واتربصوا للعتره
.................................................................................
والله لو أم الحسن تشكي اليوم
وترفع إديهه للآله القيوم
جان الأرض خسفت بأشرار الگوم
يالماردت نقمه تصير ..يا رحمة الله الكبرى
.................................................................................
بأمر الوصيه ملتزم حامي الجار
لولاهه چان الحكم حكم الفقار
بدعوة الزهره هالكواكب تندار
آذوهه بعدك يا حيف ..خانتك هاي الزمره
.................................................................................
يا شافع بيوم الحساب بذكراك
نحچيلك الحاله ونواسي وننعاك
تسجلنه يالهادي أمنيتنه وياك
بأذن الله يا خير الناس… منك ننال البشرى
.................................................................................
شيعة حبيبك حيدر وما نخسر
وباچر مجالس للعزا تتحضر
بارض المدينه وأبو صالح يظهر
ساعتهه ميظل كل ثار ..گلب البتول إنسرّه
.................................................................................
خادم الإمام الحسين عليه السلام
عمار هليل الواسطي
قصيدة (( يعين الله الزچية ))
إستشهاد رسول الإنسانية صلى الله عليه و آله
يعين الله الزچيه
يتيــمه بهالمسيه
…………………………………………………………
ليالي الحزن والحسره حزنهه
بسيف اموادع الهادي حزنهه
اعله كل ضيم وألم دايم حزنهه
تنوح الزهره والونه خفيه
يعين الله الزچيه
يتيــمه بهالمسيه
…………………………………………………………
يحيّ الله سلالتهه يحيدر
يحيّ دار الشرف تبقه يحيدر
تصيح الليله ساعدني يحيدر
تره إفراگ الأبو مكلف عليه
يعين الله الزچيه
يتيــمه بهالمسيه
…………………………………………………………
الزمن يا ضيم لأم الحسن يابه
ولا لحظه لمنار الطهر يابه
تنادي بحسره رايح وين يابه
اخذني اوياك واتمنى المنيه
يعين الله الزچيه
يتيــمه بهالمسيه
…………………………………………………………
فراگك يبو القاسم دوم سلهه
وتره الحاقد عليهه سيوف سلهه
گبل متروح يا مولاي سلهه
اوياك اتمنّت تموت الزچيه
يعين الله الزچيه
يتيــمه بهالمسيه
…………………………………………………………
ثگيل اموادعك ويطول ونهه
الزچيه وأمر موتك حان ونهه
تنشد عالليالي المضت وينهه
بدت سود الليالي بهالرزيه
يعين الله الزچيه
يتيــمه بهالمسيه
…………………………………………………………
حبيب الله ومصابك جرح بيهه
حسرتهه دهر والنِفس بيهه
دمع من دم جره من أم أبيهه
وسؤال الروح لاوين النويه
يعين الله الزچيه
يتيــمه بهالمسيه
…………………………………………………………
بعد هيهات تلگه الروح راحات
طحنهه اموادعك والقهر راحات
لمتكم سوه امن اليوم راحت
علامات اليتم صارت جليّه
يعين الله الزچيه
يتيــمه بهالمسيه
…………………………………………………………
خادم الحسين عليه السلام
عمار هليل الواسطي
قصيدة ( غربة علي )
ذكرى شهادة سيدي ومولاي نبي الرحمة أبي القاسم محمد صلى الله عليه وآله وسلم
ودعتك وضاگ الفضا بعيني
وبدفنتك چن دافـن اسنيني
جمر الحزن يالهادي يچويني
............................................................................................
حسبة امصابك صدگ حسبه طويله
الليله دين الله إنهـــدم يالهادي حيله
يا حبيب الله المواجع مو قليله
والله ليله الباعدتنه شلون ليله
فرض الحزن من خلصت أيامك
بالمهجه يبدي وكلنه أيتامك
حال الأجل ما بينك وبيني
............................................................................................
هيه مو بس فاطمه اليتّـمـهـه بُعدك
چم يتيم الليله يابو الزهره عندك
تدري أولادي يماي العين ولدك
تثگل الحسره على السبطين بعدك
أظلم نهاري وبالگلب حسره
كلما أشوفن بنتك الزهره
يجري دمعهه وهذا ياذيني
............................................................................................
هيه غربه وابتدت وبروحي غربه
ليله اوداعك وحگ العِشره صعبه
تگظي حسبه وتبتدي بالروح حسبه
مثل المضيع دليله وليل دربه
هيه الهضيمه من أظل وحدي
والگالوا أصحابك صفو ضدي
لا مو غريبه الكل يعاديني
............................................................................................
وحشه يا مولاي هالليله المدينه
واليحبك ينسمع لجلك ونينه
آه واويلاه عالبضعه الحزينه
هذا أمر الله وبعد شيصح بدينه
يختم كتابك هسه صفحاته
ليل الفگد تذبح معاناته
ويجيبني النوح ويودّيني
............................................................................................
شراح يحصل يا نبي الرحمه بغيابك
بينت الأطماع من ليلة مصابك
يا چفوف التدفع اعله الزهره بابك
عالخلافه الوضحتهه بنص كتابك
(( يهجر )) عليك شلون گالوهه
يا حرمه بعدك بالله حفظوهه
چف الزمن رايد يلاويني
............................................................................................
آني حيدر والحزن نيرانه بيه
غربة عايش بعدك وكلهم عليه
ضاگت بعيني السمه وهاي الوطيه
وبلغتني بكل تفاصيل الوصيه
هاي الوصيه ألتزم بيهه
والطاهره بعيوني اخليهه
رغم المآسي الراح تلفيني
............................................................................................
خادم الحسين عليه السلام
عمار هليل الواسطي
تعليقات
إرسال تعليق