📜:للموت مشايه
✒️:أنيس الخفاجي الكربلائي
📆:ليلة 25 محرم 1444
🕌:حسينية الكميل الحسيني كربلاء المقدسة
هالسنة امشي والسنة الجايه
يابو علي للموت مشايه
▪️▪️▪️▪️▪️
احسب ليوم اربعينك سيدي يوميه
بدفتر التقويم كاتب موعدك بيديه
موعدك امشيله حافي امتربه رجليه
بالمشي رايد اواسي زينب المسبيه
خدامك احنه وگد الحچايه
▪️▪️▪️▪️▪️
يا حسين بهذا دربك مشه شيخ انصارك
وي حبيب ابن مظاهر احنه هم زوارك
سيدي وكلمن مشالك واللي كلمن زارك
هذا احساسه وشعوره بكربلائك شارك
يوم اربعينك غاية الغايه
▪️▪️▪️▪️▪️
انه عبدك وابن عبدك وافتخر ترباتك
يشهد الله ما اعوفك لا وحگ شيباتك
(منا هيهات المذلة) اعظم احچاياتك
والمشي ما تركه ماخذ فتوه من هيهاتك
لاخر نفس وفايه وفايه
▪️▪️▪️▪️▪️
الف هنياله اليجيلك ولحضرتك گاصد
فاطمة اتسجله بسجلهه حاضرة وتشاهد
امشي اول واحد اني باربعينك رايد
حته يحسين لحضرتك اوصل اول واحد
مشتاق اقبّل بابك اهوايه
▪️▪️▪️▪️▪️
جاذبية بهالزيارة لحضرتك تجذبني
وفقتني امشي لنّك يا حسين اتحبني
رايدك بالسنة الجاية بالاسم تطلبني
بداعت العباس اخيك زايرك تكتبني
ما عندي بس هالامنية هايه
▪️▪️▪️▪️▪️
من علامات الموالي ومن سرور الخادم
كون يمشي ويعتني لك باربعينك لازم
واليظن اترك مسيرك هذا فعلاً واهم
ابقه امشي لهالزيارة لحد ظهور القائم
مثل الجرف ميفارگ لـمايه
▪️▪️▪️▪️▪️
انت باب الله الچبير الـكِلنه بي نترجه
حبك بيوم القيامة يا حسين المنجه
نندعي بيوم اربعينك باسمك ونتهجه
عجّل اللهم طلعت الامام الحجه
آيه انتظاره وطلعته آيه
تدوين 👇
ليلة 25 شهر محرم الحرام 1444 هـ
قصيدة: هالسنه أمشي والسنه الجاية
أداء: الحاج باسم الكربلائي
كلمات: الشاعر أنيس الخفاجي الكربلائي
المكان: كربلاء - موكب وحسينية الكميل
تعليقات
إرسال تعليق