قصيدة | بالفرگه جازوني
أداء | مسلم الوائلي
كلمات | حمزه الحسناوي
***
انه اليحبوني بالفرگه جازوني
رادوا يموتوني من صار الفراگ
***
كلما يجي الليل اطلع ذكرياتي
واحچي ويه العيون اگله هنا خذانه
وافرش عله الگاع رسايل من خواتي
وتأيس الروح ورد كلشي المچانه
چفي اليدور عليك حزنك خذا وين
من أيس امن الباب دگ الحياطين
انحب لحد ماطيح وانشف لماموت
وارجع واگله الروح يستاهل حسين
معقوله هاي انه البقت وحدهه ياناس
وانه الجنت اغفه وافز بعيون عباس
***
اكتبهه بالگاع وصيت هاي العيون
لاثار الجدام حجيت وي النياشين
من الضعن راح خفت عنهم يعطشون
چا كثروا بالماي عليكم راس الحسين
كلما اكض الماي وجهك يجي وياي
ياربي سترك ليش تعرضلي بالماي
مدري شلچمني عليك وتراجفت حيل
شو من اگول حسين گمت اعطش اهواي
ما ادري بس كلش خفت وتغير الحال
وچفوفي احس اتچتفت وحدهه بحبال
***
بشرني يحسين صدگ عبد الله كبران
ليهسه بالبيت سوالفنه وضحكته
هم بعدك تخاف عليه حتى من الخوان
وتوخر الثوب اذا يوصل رگبته
حاجب حلو من العين للوجنه داير
يشبه للاكبر حيل گالولي صاير
هنياله هسه الشاف وجهه وضحكته
كون برساله يصير يحسين اسافر
بويه برقيه احچيلي هواي الهه حنيت
گلهه العليله اتريدچ لاتبطي عالبيت
***
انه البقيت ثوب يطيح ابجيت الريح
حلف الجدم كون وگف مره اعله حيله
كلمن بسمهه عرفنه الوادم تصيح
بس انه يا ناس يصيحولي العليله
اتجه عالحيطان وتموت الجدام
واتخيلك گدام حتى امشي گدام
چمدوب اضل يحسين بحلامي اتانيك
انه ارد اشوفلك جاي ماريد الأحلام
مو من عوايدكم هلي اتخلوني اشتاگ
يتلاگن اضلوع الگلب ضعفن بالفراگ
***
يم ثوبك ارتاح واحس اتخف الهموم
حته اطرد الخوف احط ردنه اعله متني
وي ظلمت الليل انام ابصف الهدوم
عود انت موجود شگلك ما عفتني
حته المرض بچفاك يغفه ولچمته
لو ما كتلني اعليك ذمه برگبته
مو مثل اليعشگون عاشگتك انه
ثوبك گعد وياي گدما ندهته
هذا الگلب المن يدگ ارد افتهم ليش
لايگدر يرد المشوا لايگدر يعيش
~~~
• قصيدة :بالفركة جازوني • أداء : #مسلم_الوائلي • كلمات : حمزه الحسناوي • عزاء مسجد السيد الشهيد الصدر | 1444هـ • المكان | العراق - واسط - الكريمية
تعليقات
إرسال تعليق