تدري بحالتي تدري
غالي واغله من عمري
دمعي بس الك يجري
تدري تدري
مشاني وياك العشك حد ما صرت مجنونك
بعيوني راسملك صور يالرحمة الله عيونك
صدليه لو طارف نظر فدوة انه اروح اللونك
لا تجفي عني مروتك صدكني أموت بدونك
ليلي مناطر طيوفك
عيني رايده تشوفك
شوكي ياكل بصدري
تدري تدري
هذا انه كدامك عبد يمك امدنك راسي
سلمت بيدك يا ملك واتحكم ابأنفاسي
شتريد اعوفن ديرتي اهجر احبابي وناسي
والغربة اعيشنها وطن ما دامك باحساسي
انته بدنيتي كلشي
عيني ويحرسك رمشي
دمي وبالنبض تسري
تدري تدري
كلمة احبك ما اضن تروي عشك دلالي
وكلش قليلة بحظرتك لو كلت عنك غالي
قيس التسودن بالعشك يخجل يعاين حالي
يحسين مدري اقرأ شعر مدري الشعر يقرالي
ابجي واحجي وي روحي
بالج ينكطع نوحي
ناوي الطم بقبري
تدري تدري
يمك انه واشتاك الك واشلون اذا ما ازورك
اعمه البصيرة والبصر لو ما مشيت بنورك
ما احسب العيد اشوكت بس احسب العاشورك
حتى اقره لامك فاطمة وانعى المصاب ابدورك
عايش انا عالدمعة
همي اشلون الك انعه
البسمه ما تمر ثغري
تدري تدري
كلشي بكياني ايعود الك من هامتي ولجدامي
ايامي بس بمجلسك والباقي موش ايامي
انسه ويذكرني العطش حال الرضيع الظامي
وبمسمعي الزينب عتب حركو يخويه اخيامي
روحي تصبح بحيره
واندب وين ابو الغيره
زينب نادتك خدري
تدري تدري
اتخيل انه بكربله وانظر مصارع ناسك
والشمر لازم شيبتك وبسيفه يقطع راسك
اركض اضُل بلا وعي واحساسي وي احساسك
اصرخ يبو اليمه شعجب شو ما نهض عباسك
ضامي واكطعو نحرك
الخنصر طايح بكترك
الصدرك كمت ادك صدري
تدري تدري
الشاعر
وسام الشويلي
تعليقات
إرسال تعليق