📜 القصيدة: عالم الرؤيه
🎤 أداء: مسلم الوائلي
🖋 كلمات: علي الأكبر الغرابي
~~~
بعالم الرؤيه الحمام
كاتب بجنحه الختام
ونعش طوله بگد امام
گوه شفته من السهام
~~~
بليله غربه ودنيه مدري شلونها
بعالم الرؤيه وتغير لونها
حاولت افهم شكو من عيونها
وعرفت جان الحسن مضمونها
الحسن عرشه .. صار نعشه
بليله وحشه .. يا هظيمه
بالحسن لمن دريت
بالحلم دم بجيت
ونعش ابن خير الأنام
گوه شفته من السهام
~~~
عيوني شافت مدري يتراوالها
اسهام تركض والنعش منوالها
حاولت امنعها وتصدالها
بس شفت روحي خيال اگبالها
الليل جرحي .. ذبح صبحي
انهدم صرحي .. والله حيره
مره أوگف مره اطيح
مره اركض جني ريح
جنه واقع مو منام
گوه شفته من السهام
~~
ناس اشوف واسمع احجاياتهم
بثگل همهم تنترس خطواتهم
توصل السابع سمه شوغاتهم
وترست عيون الزمن دمعاتهم
يا حزنهم .. والحسنهم
عالي ونهم .. من سمعته
الرابع اصحاب الكساء
جروحهم تنزف وفاء
الرايته تعني السلام
گوه شفته من السهام
~~
دموعي فوگ اخدودي تركض حافيه
وحرمه اشوف مسلبيها العافيه
تصيح خويه وبالمعاتب لافيه
شمعة الخوه بوداعك طافيه
تخيلتها .. ما شفتها
توقعتها .. جنها زينب
شفت الموادع غريب
بين محبوب وحبيب
والجره بذاك الظلام
گوه شفته من السهام
~
من الحلم فززني جرح احساسي
وامشي وعثر وختنگ بنفاسي
انسه كلشي ايجوز بس ما ناسي
لنعش صوره بعدهي براسي
امشي وعثر .. جرحي يكبر
والله منظر .. ما نسيته
وين ما امشي وروح
غافيه بروحي الجروح
من الدمع صار الكلام
گوه شفته من السهام
°°°°°°°°°°°°°°°°°°°°°°°°°°°°°°°°°
تعليقات
إرسال تعليق