📜قصيدة : ابجي عليك
🎤الرادود : كرار الكربلائي و ياسين الرميثي
🖋الشاعر : الشاعر وسام الشويلي
~
ابچي اعليك ابچي اعليك .. خلّيهم يلوموني
مايدرون مايدرون .. لأجلك خلقوا عيوني
~~
هوايه اليسألون بيّه
ليش عاشرت الدمع
ليش ما ابطل ونيني
ليش نوحي مرتفع
جاوبتهم وبجوابي
رايد الكل يستمع
شلون ما ابچي وعيوني
بيها منحر منگطع
أصيح حسين .. ذبيح حسين
شيريدون شيريدون .. منّي بحالي خلّوني
مايدرون مايدرون .. لأجلك خلقوا عيوني
~~~
شحچي وي اعمه البصيره
ماعلى الأعمه عتب
و إلّي مايبچي المصابك
هذا توفيقه انسلب
غاليه دموعك يغالي
وما أبدلها بذهب
وشكثر اشعر براحه
لو الك زاد التعب
غرام حسين .. هيام حسين
بالدمعات بالدمعات .. احچي وي اليحاچوني
مايدرون مايدرون .. لأجلك خلقوا عيوني
~~~
راحة البال بطريقك
گلبي والساني نطق
وآنه ادري الما يحبك
عايش بحيره وقلق
منبرك هوّه السفينه
والأمان من الغرق
يعني اليعوف المجالس
راح نحو المنزلق
حياة حسين .. نجاة حسين
لا ما اضيع لا ما اضيع .. عنّك مايحرفوني
مايدرون مايدرون .. لأجلك خلقوا عيوني
~~~
هواي ركضوا وره الدنيا
والعهد ذاك انترك
وآنه الك شدّيت حيلي
وركضه جيت المنبرك
الناس فرحانه بلعبها
وآنه ابچي المنحرك
وحتى يوم العيد انعه
وبي احس بعاشرك
بكاء حسين .. عزاء حسين
يوم العيد يوم العيد .. ابچي واجوا سألوني
مايدرون مايدرون .. لأجلك خلقوا عيوني
~~~
آنه مو كل اليجيني
ايصير اخوي وصاحبي
واليحبني ايعيش مثلي
ضمن منهج كوكبي
صاحبي كون اشم منّه
عطر تل الزينبي
وانظر بوجها ملامح
من تعب ذاك السبي
هواه حسين .. مناه حسين
يبچي هواي يبچي هواي .. مثلي وباللطم عوني
مايدرون مايدرون .. لأجلك خلقوا عيوني
~~~
سيدي الأحداث خطره
واحنه في آخر زمن
لا أمان بلا عزائك
من مُضلّات الفتن
ضايعه الناس وغريبه
وانته بس انته الوطن
ما الها غيرك وادعي
بالفرج لأبن الحسن
أمان حسين .. ضمان حسين
يمته الثار يمته الثار .. عذّالك يسألوني
مايدرون مايدرون .. لأجلك خلقوا عيوني
°°°°°°°°°°°°°°°°°°°°°°°°°°°°°°°°°°°°
تعليقات
إرسال تعليق