سلام يامهدي متى ترانا ونراك
ـــــــــــــــــــــــــــــــــــــــــــــــ
مشتاق الك ياابن الحسن واتوسل اطيوفك
ليش آنه مااشوفك كل جمعه بدموعي
تترتل احروفك
سلام يامهدي متى ترانا ونراك
ــــــــــــــــــــــــــــــــــــــــــــ
سنين.... عشت منتظرك سنين
اناشد وينك يالغالي وذابحني الحنين
تعال....ولو بس طارف خيال
يسكن قلبي المتعذب من كثر الونين
احجيلك... واتاني جوابك
اشكيلك... واعرفه عذابك
ادعيلك...تعوفه غيابك
هالدنيه مابيها طعم ماتسوه من دونك
لذتها بعيونك مااقلك اشلوني بس اسأل شلونك
اصيح يالغالي وين انت واتمنى لقاك
سلام يامهدي متى ترانا ونراك
ـــــــــــــــــــــــــــــــــــــــــــــــــ
سلام.... الك من قلبي سلام
تنام اعيوني وماادري شلون انت تنام
انوح.... وبعدها لاهلــي اروح
ولكن انت وين اهلك محترقه الخيام
بالصحره وحيد بنوحك
والحسره تعيش بجروحك
جم مره تطيح اعله روحك
عايش غريب لوحدك والكافل اتشوفه
متقطعه اجفوفه لاينهض لزينب
ولا زينب تعوفه
جروح من زينب لليوم مسراها بدماك
سلام يامهدي متى ترانا ونراك
ـــــــــــــــــــــــــــــــــــــــــــــــــ
قتيل....الك بارض الطف قتيل
الخيول العشره على صدره
صار الهن صهيل
السماء.... بجت دم لاجله السماء
ومثلها اعيونك يالمهدي ظلت دم تسيل
يوميه تعيش امصيبه.... ليليه تون للغريبه
مسبيه وخدرها شيجيبه
راس الحسين اعله الرمح تنظرله باحساسك
شيب انترس راسك آه لخدر زينب تطلع وي انفاسك
الهموم ماتخلص للشام جرح الطف خذاك
سلام يامهدي متى ترانا ونراك
ـــــــــــــــــــــــــــــــــــــــــــــــــــــــــــ
ضياع....الحياة ابدونك ضياع
اعيش بهيمه ومن حولي ملتمه الضباع
غريب....جرح ويدور طبيب
ابحور الفتنه والمركب يمشي بلا شراع
ينجيني دعاك اشراعي.... دليني ذبحني ضياعي
قويني تلوه ذراعي
عندك علم هذا الزمن....صاير مثل غابه
متسيده الذيابه....من قد مآسيها هالناس مرتابه
الناس مختنقه ماتنتعش بس بهواك
سلام يامهدي متى ترانا ونراك
ـــــــــــــــــــــــــــــــــــــــــــــــــــ
اشتياق.... الك بيه اشتياق
الوكت تعبني ومليت من اوجوه النفاق
الفساد تشوفه بكل البلاد
يموج العالم والاصعب احوال العراق
اتعنه ادور امانك.... اتمنه يضمني حنانك
ياجنه الحلمها زمانك
تدري انملت جور وظلم وانت ال تصفيها
الحق ياراعيها.... قسط وعدل بيدك يالمهدي تمليها
ارجوك لا تطول ارض تناديك وسماك
سلام يامهدي متى ترانا ونراك
الشاعر
ـــــــــــــــــــــ
وسام الشويلي
تعليقات
إرسال تعليق