📜قصيدة : حسين ياخويه
🎤الرادود : مسلم الوائلي
~
حسين ياخويه .. حسين ياخويه
~~
تعبت من الرگض والخوف يحسين
عثر جدمي او نخيتك تگعد النه
الخيم طاحت علينه او جينا حفاي
وحگك جا بالخيام احترگنا
او مثل صدرك بناتك ترسن الگاع
بالف ميت گبر طولك عثرنا
غيور او حتة لو مذبوح تنهاب
شكبرها العازة وبمذبوح لذنه
يمتعب اليدگ .. لگيتك ما تنشبگ
جبيرة جروحك حيل
مذبوح النحر .. واثر صاعد فوگ اثر
حوافر هاي للخيل
ضيم ماعايز وجملك .. بس اجيتك
ترضه ماترضاها .. شتموني بثنيتك
~~~
عبي تمنينة يمك وانت مذبوح
نگعدك گوه بس ما بيك گعده
لجمنه اجروحك اعلى البلگت تگوم
هضمناك او گلت ما بيه هدة
زلم وصلتنه يمك واحنا نسوان
عليك تلملمن وحده اعلى وحده
تكابلنه ونريد انگعدك اردود
عبرنه لماهن وصدرك تعبنه
گاضي من السحك .. ضمه وبالدم مخنتگ
رمل بجروحك طاح
من ذاك العصر .. اجت خيل اعله الصدر
شفت يمك ذباح
حز رگبتك بيده .. وتباوع بناتك
وشال راسك بيده .. ولشگك عباتك
~~~
شكثر تيهنه بالطف من اجينه
انعمله عالعطر دلانه بنهار
لكيناك وگعدنه اعتاب وياك
صدر ماهوه والدم بالنحر ضال
ذبيح ومنسلب والحيل مو حيل
بعده الخيل تطلب صدرك ارگاض
ندنيك ونفر وتطشرك الخيل
واحسك من نرد علينه مختاظ
تطشر والم .. وارد من بين الزام
ادور الضاع يحسين
ماتلتم صعب .. تعب ياذبح الگلب
حرت بوداعه منين
من العصر لليل .. گلبي وياك حاير
عفيه صدره .. لمارضى يعبرله حافر
~~~
بعد ما منها لازم عنك انروح
وادري مقصره بس ماريد تزعل
وشكثر لمينه بس ما تگضي يحسين
ادواره من الشريعة عليك ننده
گلت هلبت الاگي الخنصر الضاع
واردنه بمجانه وعنك ارحل
ادور موتي بين اجروحك وضاع
گلت بكلي الله اموت وكلشي ينحل
بأكثر من جرح .. ردت وياك انذبح
واضوك الموت وضماه
ياغبشت صبح .. ردت وي راسك رمح
يروح براسي وياه
كون مذبوحه .. ولا اروحن سبيه
ولا يطب للسوگ .. طاري الهاشميه
°°°°°°°°°°°°°°°°°°°°°°°°°°°°°°°°°°°°°°°°
تعليقات
إرسال تعليق