📜قصيدة : حرب الذاكرة
✒️للشاعر : حسام الحمزاوي
📅: ليلة 26 محرم 1444
🕌: حسينية الكميل الحسيني كربلاء المقدسة
حرب الذاكره يجرح بالاحساس
لگينه الشام ناس تبارك الناس
والتموا علينه .. يضحكون البجينه
واجوا گدامنه يهوسون بالراس
📌📌📌📌📌
دخلنه الشام والبچتني عمتي
كلها تصيح زينب وين چنتي
مو مكفوله شو انتي الكفلتي
شلون ابغير خوانج رجعتي
مچتوفه ويتاماها بحظنها
كل شويه جروا طفل منها
حارت من تلزمه .. كلها تصيح عمه
عمتي تصيح وينك يبو النوماس
📌📌📌📌📌
دخلنه الشام وكت المغربيه
الحبل يطلع شما ضميت اديه
حيل وياكم ايصيحون بيه
ما شفنه ولا چلمه خطيه
بچي جوه العبي وما سكتوهن
شيسكتن ويمهن راس ابوهن
ويأمرهن اضحكن .. تره ممنوع تبچن
كلما سكتن يهز راس عباس
📌📌📌📌📌
سوگ وماكو واحد عنده غيره
شتايم وين ما وجهي اديره
حجه اشكال الحجي الميت ضميره
ابسط كلمه ما عدهم عشيره
ولا حاجوز يركض يوگفلنه
گام الروس تنزف بالمحنه
غربه وغيره ميته .. خلصناها سكته
سواد گلوبهم بالصخره ينقاس
📌📌📌📌📌
شامت گاللي تشبه عضيدك
ليش الرمح ما لايح وريدك
يعرفني عليل وگال اريدك
اخوتك ذوله فنك ترفع ايدك
وانه العيني ما توصل اديه
وينه ووينه يستعرض عليه
لچمتني السوالف .. من گالولي خايف
وانه من المرض ما اجر الانفاس
📌📌📌📌📌
شفناهم امزينين المدينة
ويهوسون وينه حسين وينه
واحد يندس بواحد علينه
عدهم زلمه شو ما ذابحينه
زينب لأن تتهدد حياتي
من گد خوفها مچلبه ابعباتي
حيرة عمتي حيره .. رغم كلشي اميره
ما خلت عبايه بريح تنداس
📌📌📌📌📌
وصلنه القصر بطبول وهلاهل
تلگونه برمح بي راس مايل
دمه من الهضم للگاع سايل
عثرنه بشوفته وجرنه المقاتل
بطرف عينه يزيد يصد علينه
گعدنه وگاموا يحسبون بينه
يزيد اشر هديه .. ما ينطر رقيه
ماي الما وصل من جود عباس
📌📌📌📌📌
شنسه وشذكر من الماكو رحمه
علينه الچان شارد صار زلمه
الجاب الراس گال العمتي كلمه
ابصلافه يگلها اخوج شلون جسمه
واحد صاح اخوها اخباره عندي
الخيل الزينب تجيب وتودي
موقف ما نسيته .. لو حرك لحيته
من الصندوگ تطلع ريحة الياس
📌📌📌📌📌
تدوين
ليلة 26 شهر محرم الحرام 1444 هـ قصيدة: حرب الذاكرة أداء: الحاج باسم الكربلائي كلمات: الشاعر حسام الحمزاوي المكان: كربلاء - موكب وحسينية الكميل
تعليقات
إرسال تعليق