📜قصيدة : واكفات
🎤الرادود : محمد باقر قحطان
🖋الشاعر : علاء الزيدي
~
واكفات حايرات ماي الابوهن رايدات
~~
طلعن عفيفات الخيم
واستقبلن خالي المهر
واسئلنه خيالك وكع
هز راسه والهن يعتذر
عطشان ناده يا خلك
فوك العطش شمس الضهر
كل ساعه ويسمعن ضلع
من صدر ابوهن منكسر
صافنات صافنات كسرت ضلع ماسامعات
~~~
بين الخيم يتراكضن
موقفهن يفطر الكلب
من الجيش كلش يستحن
يطلبن الابوهن ماي شرب
نايم على وسادة رمل
الخيمة بناته يرد صعب
حاول يكوم وما كدر
وتتمضحك كباله الغرب
حافيات حافيات لاكعدن ولا رايحات
~~~
ينازع بده بحر الشمس
سبعين الف مارحمته
رغم العطش رغم التعب
خيل اعوجيه داسته
ماتن بناته من البجي
صعبن عليهن حالته
شال ايده لسكينه وبجه
ارجع دخيلك صاحته
باجيات باجيات كلهن اهم شي سالمات
~~~
شمرو على حسين الحجر
والدم على عيونه جره
ويتبادلون على الطعن
عشره بعد عشره سره
واحد يجر بمحبسه
كالوله لاجر محبسه
نرعب بناته وغمضن
يردون كطعة منحره
صايحات صايحات مغمِ عليهن طايحات
~~~
كل الخيم هسه بخطر
ياعمه والدنه انذبح
مو جنه ذاك على الرمح
ياعمه ابونه هوه صح
سكنه ورقيه اتشابكن
كلب اليتيمات انجرح
ضالات ضالات ينزلون راسه متانيات
°°°°°°°°°°°°°°°°°°°°°°°°°°°°°°°°°°°°°°
• أداء : الرادود محمد باقر قحطان • كلمات : الشاعر علاء الزيدي • عزاء هيئة الشاب الحيدري السنوي • ذكرى شهادة الإمام السجاد ( عليه السلام ) • حسينية الشيخ أحمد الوائلي (العراق/ واسط _ الشيشان )
تعليقات
إرسال تعليق