📜قصيدة : الزياره هالسنه ثكيله
🎤الرادود : مرتضى حرب
🖋الشاعر : مسلم المطوري
~
الزياره هالسنه ثكيله
والحمل بس اهله تتجيله
واحنه اهلها .. نخدمها كلها
حسين يستاهل نضحيله
~~
مانبرد لانتعب لابينه اليمل
خدامك تعرفنه تجاية حمل
تستاهل نوكفلك ياراعي الفضل
بس كبرك يم بابه يلتم الشمل
هله بكد ماكالت الوادم هله
وليجي يزور الحسين ندلله
هالسنه الخدام بالدم كاتبين
كون كل مجان يصبح كربله
هاي الزياره نتعب عليها
كل المواقف تنذكر بيها
خذب حملها .. نخدمها كلها
حسين يستاهل نضحيله
~~~
نتعبلك بالخدمه تستاهب تعب
نوكف للمشايه سوباط العنب
عابس يتلكاهم واليطبخ وهب
والحارب زوارك خيشوف العجب
خله يسمعنه الدره والمادره
مايغرنه كلام المحبره
احنه خدام الحسين وثابتين
والخدم كلهم كالو حجاية
هاي السنه ندلل المشايه
هيه واهلها .. نخدمها كلها
حسين يستاهل نضحيله
~~~
ماتصعب عالخادم خل تكثر بعد
يتونس بالموكب لو زاد العدد
من نثبت بالخدمه يحسدنه الوتد
يالخدمت زوارك احله من الشهد
يحله بعيون الخدم كلما كثر
عدد خطار الحسين من البشر
تشهدلنه الكاع يوم الاربعين
بكربله ماننحسب مثل المطر
شوف الجفوف وتعرف الغايه
ماكو مثلها .. نخدمها كلها
حسين يستاهل نضحيله
~~~
خدامك بالموكب شدادت حزم
مابينه اليتعاجز عشاكك زلم
جن فزعت انصارك بالزاير نهم
بس خدمت زوارك مو واقع حلم
خدمتك يحسين عنوان النصر
والله لو ماخدمتك ضاع العمر
كون وياك المواكب بالطفوف
يم ركبتك ماوصل سيف الشمر
كون المواكب حضرت العاشر
جا هسه عبدالله كمر صاير
ولكل كفلها .. نخدمها كلها
حسين يستاهل نضحيله
~~~
كل موكب يم موكب توكفلك سوه
حته الجنه تبين من كد الضوه
خدامك من فزعو لجروحك دوه
والشاهد مو واحد لاطف نينوى
حسين من يحتاجنه نوكفله علم
نوكف بوجه الجمر مثل الخيم
فقط بس دربك سمع جلمة نعم
بس الك جلمة نعم كلناها
يحسين بيها صحنه وبيها نتباها
تقبل عملها .. نخدمها كلها
حسين يستاهل نضحيله
~~~
شي تخدم شي تلطم شي تنصب خيم
شي تطبخ شي تعزم شي ترفع علم
ماكالو للزاير بس كلمة نعم
كل هذا وصاحولك قصرنه الخدم
العوز مايكدر يكض جف الكرم
محزمين ووزرو حته الحرم
لجل زينب بالخدامه متربين
اخر الوادم تجي الصحن الحرم
هاي الخدم بس انته صاحبها
بدموعها تفلش مواكبها
يحسين املها .. نخدمها كلها
حسين يستاهل نضحيله
°°°°°°°°°°°°°°°°°°°°°°°°°°°°°°°°°°°°°°°
ليالي : محرم 1444 هجري القصيدة : الزيارة هالسنه ثكيله اداء : مرتضى حرب كلمات : الشاعر مسلم المطوري المكان : الكوفه العلويه المقدسه _ حي ميسان_ حسينية وهيئة الزهراء
تعليقات
إرسال تعليق