يوليدي ياعلي حسين الجابري كلمات مكتوبة

*{{يوليدي ياعلي}}*

يبني علي..يا غرامي و شوگي و أحزاني
يبني علي..يا جمال عْيوني و وجداني

١/ يوليدي من ظهر المهر گدامي شالك
ما بيني وبين الشمس والمح جمالك
صورة غرام اعله الثره توزع خيالك
لا تمشي سبحلك گلب عاشگ وصالك

غصنك حياة الي والظمه هدده
هاك اخذ عيني لعطش گلبك نده
روحي ودليلي وعيني إلك فده..يبني علي

غصنك عطش وانه عطش خاطري
شلون اگدر انسه جمالك يـ "ٱكبري"
سورة شبابك يكحله ناظري..يبني علي

يبني علي..كَحّل عيوني جمال عيونك
يبني علي..راح اظلن بس جرح من دونك

٢/ من عيني اتبده الصبر من شفتك تريد
ماي وخيمنه من النهر  يالاكبر بعيد
بس چلمة الماي امتلك والكلمة شتفيد؟!
وآنه ويه ماي العلگمي ميته المواعيد

يبني ملامح حسنك تغيرت
چنها بعذابي كربله ما درت
وردك عطش وغيومي دمع جرت..يبني علي

وينه جمالك حبيبي الهاشمي
وجهك يريده ظلام مخيمي
لورد المحبه يطولك ينتمي..يبني علي

يبني علي..غصنك اخضر عودتهم ناسك
يبني علي..يصير يابس مو عوايد ياسك

٣/ يفيض الحنان لشوفتك لو صار الفراگ
كحله رمش عيني "علي"..و من عيني تنباگ
تمشي ونبض گلبي يدگ ألحان الاشواگ
راح اعطش لوجهك واظل لعيونك اشتاگ

تغيب المحاسن يا علي بالحرب
وانته بجمالك تگطع اصعب درب
بيش آنه اودعك يبني بيا گلب..يبني علي؟؟!

رايح ورد علي يبني و من ترد
بعين الخليقة جمالك ينحسد
ترجع عطش ذابل بيك الورد..يبني علي

يبني علي..شلون اشوف شفافك ذبلانه
يبني علي..وانه عيني لشوفتك عطشانه

٤/ طولك بساتين العشگ وبگلبي مزروع
عشرينك بعيني غصن من گلبي مگطوع
راح اوگف بدرب الصبر واحنيلك ضلوع
لاترس سواجي محبتك من فيض الدموع

ارجعلي يبني واگلك يا هله
بيك شحلاته شملنه ابكربله
بعين الفواطم غيرك ما حله..يبني علي

حروف المحبه يالاكبر شملتك
بس تمشي يبني تبين خلتك
شلون ابدمعتي واشوفن ليلتك..يبني علي

يبني علي..شلون اضمن دمعتي عن ليلى
يبني علي..من اردن حيلي فاگد حيله

٥/ تانيني يا روح العشگ مو هينه وتروح
ارحم گلب ليلى الـ يون ويسولف جروح
يم باب المخيم دمع من امك يفوح
من شافتك فوگ المهر ظلت بلا روح

ليلى بخيمها تسولفك عمر
شافت منيه لمن شافت مهر
ناوي اعله حومه زلمها بكل كتر..يبني علي

نياط ابگلبها عليك اتگطعت
سدت خيمهه عليهه وفرعت
"ياربي ابني واريده" اشكد دعت..يبني علي

يبني علي..يا سلامة عيني وناظرهه
يبني علي..روح لامك منگسر خاطرهه