افتح عيون القلب محمد باقر الخاقاني كلمات مكتوبة

 

صلى الله عليك
الذي جعل أفئدة من الناس تهوي إليك

ــــــــــــــــــــــــــــ

إفتح اِعيون الگلب
اْو شوف من خلْف الحُجُب .. طريقي
اتأمّـل ابهذا الدرب
هذا ليْـسمّونه حُب .. حقيقي  !


من تقوى الگلب عظِّم .. أعظم شَعيره
او سِد عين البصر و افتح .. عين البصيره
اتشوف امِّ الخدر ردَّت .. لاچن أسيره

لا اتشوف الدرب خيمه .. و ابصفها خيمه
شوف العايله ابهيمه .. اتذبها اعْله هيمه
او كل طفله التشاهدها .. اتصوّر يتيمه

او من بين صوت الزائرين
ابإذن الگلب إسمع ونِين
ما زالت العيله تنوح
من أربعين لـ أربعين !

و ابواقعك عيش الخيال
من تنچوي ابحرّ الرمال
اتصوّر بنات امدلّلات
بالشمس و ابچفهن حبال


صلى الله عليك
الذي جعل أفئدة من الناس تهوي إليك

ــــــــــــــــــــــــــــــ

الممشه بالظاهر سفر
لاچن الباطن صور .. غريبه
ابهالدرب ملگه بشر
او ملگه جسْم اويه النحر .. مصيبه



بالحر و الشمس لمّن .. تتعب يجيلك
خادم معتني ايگلك .. گوَّه الله حيلك
شايل لك عذِب بارد .. يروي غليلك

تطوي موكب لـ موكب .. درب السّلامه
زاير كربله واجب .. يُحفظ مقامه
و لخاطر أبو اسكينه .. تلگه الكرامه

لاچن اسكينه ابلا راي
اتذكرها من تشرب الماي
من تستظّل ابهالطريق
اتذكّر الما عدهن افياي

و الليل لو هوّد عليك
تلگه المچان اليحتويك
اتذكر خرابه ابلايه باب
و ابچي ابكثر ما حرگه بيك

فانظر بین یدیك
سترى قَصَصاً بل غُصصاً دما تُبكي مُقلَتَيك
————

https://t.me/mirza_adel_ashkanani