ركبنه الخيل محمد الجنامي كلمات مكتوبة

 

القصيدة: رِكَبْنَه الخَيْل
الرادود: مُحَمَّد الجنَّامِيْ
الشاعر: وسام الشويلي
~~~~~~~~~~~~~~~~~~~~~~
گلت إلنه اركبوا الليل گنالك رِكَبْنَه الخَيْل
والكلمه إلك يحسين نحچيها
هيّه الدنيا تِسوه وأنته ما بيها؟

لا يَبْن النَّبيّ .. لا يَبْن النَّبيّ
~~~~~~~~~~~~~~~~~~~~~~
گلت إلنه يوالينه هذا الليل غاشينه
رايدنه بكلامك حمل نتّخذه
لا مو عالزلم ننعد مِن نمشي ونعوف الحد
والله العمر دونك ماكو بيه لذّه

بالليل رايد كل شخص يَنجو بِنفسه
يحسين عالعدوان إِهجِم بينه هسّه

شيجيب الصبح يحسين وانشّوفك دربنه امنين
والله ارواحنه اگبالك نبدّيها
هيّه الدنيا تِسوه وأنته ما بيها؟

لا يَبْن النَّبيّ .. لا يَبْن النَّبيّ
~~~~~~~~~~~~~~~~~~~~~~
احنه نطيعك بكلشي لكن سالفة نمشي
تعذرنه عليها مو محل طاعه
هالدّنيا و مناظرها مِنّ أوّلها لآخرها
ما ردناها ردنه ابخيمتك ساعه

يحسين هاي الناس شملهّيها عنّك
وانگول هوّه شحصّل الما أخذ منّك

وادم مدري بيش اتقيس مستَحوذ عليه إبليس
واحنه الّي عرفنه شلون تاليها
هيّه الدنيا تِسوه وأنته ما بيها؟

لا يَبْن النَّبيّ .. لا يَبْن النَّبيّ
~~~~~~~~~~~~~~~~~~~~~~
ناس تدوّر السُلطه بالأموال مرتبطه
واحنه نگول ذنّي فدوه لنعالك
ما گلنه إلك أَقدم دمّ الكربله انقّدم
مو حبر ابورق بالدّم كتبنالك

كلمات كتبتهن إلك گطرة الگصّه
هالراس لو ما شايلك والله نگصّه

يالعنّك تريد انروح ما نطلع نِطَلع الروح
ساتر عالخيام الجثث نبنيها
هيّه الدنيا تِسوه وأنته ما بيها؟

لا يَبْن النَّبيّ .. لا يَبْن النَّبيّ
~~~~~~~~~~~~~~~~~~~~~~
لو عفناك يالغالي وين انروح بالتالي
حتى ايزيد باچر ما يقدّرنه
ويّ الزلم ما نگعِد وبسد الحَرم نِلبد
صَدّگ من نعوفك هذا منظرنه

يا حيف عالباع الشّرف و اشتره الذلّه
لو مات حتى الگاع باچر ما تقبله

تطبگنه السّمه اعله الگاع والله ولا عهد ينباع
بعنه ارواحنه و بس انته شاريها
هيّه الدنيا تِسوه وأنته ما بيها؟

لا يَبْن النَّبيّ .. لا يَبْن النَّبيّ
~~~~~~~~~~~~~~~~~~~~~~
سبعين ألف عدوانك و سبعين احنه واخوانك
معناها ابألف واحدنه بل اكثر
ندري ابكربله زغيره ما تكفي لأبو الغيره
گبله انريد نهجم حتى تتكبّر

عبّاس راح انعوفله العاجبته روحه
بالگاع لو فوگ السّمه الكافل يلوحه

راس انگصّه نعبر راس هذا حصّة العبّاس
و يزعل لو حصّته لو ما نخلّيها
هيّه الدنيا تِسوه وأنته ما بيها؟

لا يَبْن النَّبيّ .. لا يَبْن النَّبيّ
~~~~~~~~~~~~~~~~~~~~~~
✍🏻https://t.me/bk_mj_96
~~~~~~~~~~~~~~~~~~~~~~