قصيدة | لا تساومني |
الرادود : حيدر البياتي
الشاعر : محمد البشير
لا تساومني اعله دمعي
للحسين بعزائه
لــن تنــال البــر حـتـى
تفتهم كـربلائه
🎶〰〰〰〰〰〰🎵
هذا حسين و ربنا الواحد
مـا خالق مـن حِزنـه إثنين
هذا حِسين الخله إبن آدام
يخجل من يتسمى حِسين
لا تـتجــاسـر يـالتبغـضنــا
ومــن تسولف سولف زين
تعقلها نعـوف إبـن الزهرة
ونمشي لإبن المدري منين
كلشي بيد إبن الزچية
وذني أرضه و سمائـه
لـن تنــال البـر حتى
تـفــتـهم كـربــلائــه
🎶〰〰〰〰〰〰🎵
لمن تعرف روحك جمـرة
شعندك و تهـد اعله الماي
ليش تكص احبال الخيمة
وتطلب منها تسـوي فياي
اثبت ليش تناقض روحك
اثبــت لتضـل رايـح جـاي
نــار و جنـة وإنت بكيفك
لــو ويــاهـــم لــو ويــاي
كلشي يفنى و يبقى هو
الله رايد بقائه
لــن تنــال البــر حـتـى
تفتهم كـربلائه
🎶〰〰〰〰〰〰🎵
ينقاس الفـارغ مـن يحقد
و العــاقـل بالحب ينقاس
لا ترمي اسهامك عالجربة
و تطلب مـاي من العباس
مرضـاة الزهــراء اترفعك
وتنــزلك مرضــاة النـاس
دمــع النـاس ينزل راسك
دمـع المجلس رفعة راس
و الدعا و دمعه اعله خده
الله يقبل دعائه
لــن تــنــال البــر حـتـى
تفتهم كـربلائـه
🎶〰〰〰〰〰〰🎵
سوانه الباري لهل الخدمة
و الخـدمـة السـر المكنون
والبــاري اليختـار الخادم
هـو يـگلـه ( كـن فيـكون )
يعني مـن اخدم ما اتمنن
آنــا الخــادم والـمـمنــون
آنــا الخــادم والسلطـــان
وآنــا العــاقل و المجنون
خـلي محچـاك بـردائك
عشگي سلبو ردائه
لــن تنــال البــر حـتـى
تفتهم كـربلائه
🎶〰〰〰〰〰〰🎵
صـح نحـدب لمــن نـخدم
بــس باجــر نـعدل وندوم
نعدل و اليحچي اعالخادم
يتلـوه شـلــون المـسمــوم
كلشي يمـوت والله الدايم
واللايم خـل يبقى يــلــوم
حگه المجهول من يسولف
بالمــوزين اعــلــه المعلوم
والموالي صعبـة يوگع
للحسين انتمائه
لــن تنــال البــر حـتـى
تفتهم كـربلائه
🎶〰〰〰〰〰〰🎵
مـا غرتنــا الدنيــا بـ مـال
و لا جرتنـا اعلـه التطبيع
بعنـا الدنيا لـعين حِـسين
ولـو عدنـه اكثر هـم نبيع
منهج ربنا الحب يالجاحد
لا تـبـني لحـقدك تشـريـع
بـاجــر ينـدلونـا واسـمـك
كحلـة بعين غـراب يضيع
باجـر يغـرگنا نـوره
ونقتبس من ضيائه
لن تنال البر حتى
تفــتهم كـربلائــه
_
تعليقات
إرسال تعليق