الملا محمد بوجبارة
كلمات الشاعر حسن طاهر المعيبد
~~~~~~~~~~~~~
ورده وتدوّر حضن ساگيها
والعطش بالصحره يفتر بيها
و بالأسى تفوح .. غصن مجروح
(١)
طول الرحله بس تتصفّح الوادم
وجفنها من مسية الفرگه ما نايم
بعطرها امبينه ورده من (بني هاشم)
حلمها تشوف (مُسلمها) يرد سالم
مثل رجفة غصن بالريح .. هيچ الشوگ خلاها
إذا تتلفّت اتدوره .. الضعن يتلفّت اوياها
والرساله الـ بالدمع مكتوبه:
والدي، محتاجه شمّة ثوبه
اختنگت الروح .. غصن مجروح
******
(٢)
لو حان الفرض الله يساعدها
الما تسمع لاذان بصوت والدها
(حميده) بالدمع غرگت (محامدها)
و تتأمّل يجيها (احسين) يعايدها
ويگلها: گرّت عيونچ .. بوجه الوالد الغالي
لچن منّ الحلم تفزع .. فقط دمعه وحضن خالي
تدوّر بوجه (الحُسين) ابشاره
وترجع اكثر من گبل محتاره
ترجع تنوح .. غصن مجروح
*******
(٣)
زغيره بس گلبها ونّته اثجيله:
مصحف منكسر خاطر تراتيله
چفها للدُعا ما تگدر تشيله
تلزم راية العباس وتدعي له
يكاشف كرب اخوك (احسين) .. إكشف حيرتي وكربي أبويه يقدّس اچفوفك .. خلّيها على گلبي
اتگلّه: إمسح عالجفن بالرايه
وافتح وألگى الأبو وايّايه
و غرّته اتلوح .. غصن مجروح
*******
(٤)
شيعوضه الأبو لو عاف لبنيّه
شيفيد الماي للعطشانه حنّيه
الطفله برحلة الغربه الحُسينيه
امن اتودّع ابوها، تحسها مسبيّه!
تظل تتمنّى والدها .. إذا ينجاب طاريّه
يجي وتجيب خاطرها .. واتخلّيه باياديّه
گبل ما تنشد أبوها اشلونه
امن التعب تغفى بأمان اعيونه
اتگلّه لا تروح .. غصن مجروح
******
(٥)
الأبو لمّن تصير ابعيده أحضانه
بليالي الصيف ترجف بنته بردانه!
بت (مُسلم) تصد لـ(احسين) حيرانه!
كلما نادته، تتغيّر الوانه
الله يعين ابو اليمّه .. شيبدي بهمّه شليكتم
يظل يتوچى عـ(العباس) .. إذا جابوا إسم (مُسلم)
الراح ابن عمّه و رفيق اجروحه
تنسمع بونينه كسرة روحه!
يعيش مذبوح .. غصن مجروح
******
(٦)
بيا حاله إذا إسم الأبو اتسمْعه
وجفنها بالعمر أصغر من الدمعه
لو عدها گلب يسمعها من تنعه
تطاوعها المسافه و توصل لـ (طوَعه)
تشوف بطيف والدها .. بدروب الديره لبعيده
إذا يتذكّر ابنيته .. يطيح الماي منّ ايده
تمشي ولو مرها طاري (الكوفه)
تدوّر (احسين) وتضم اچفوفه
ونها مبحوح .. غصن مجروح
******
تعليقات
إرسال تعليق