📜 قصيدة :- ليله وحشه .
✍ كلمات :- الشاعر وسام الشويلي .
🎤 أداء :- الرادود محمد الجنامي .
🖤💙💙🖤💙💙🖤
ليله وحشه وآنه وحدي والجروح اهوايه
خيمه وحده ماكو عندي امنين اجيب الرايه
حاركين اخيامي ... ضايعين ايتامي
و الجروح اهوايه
🖤💙💙🖤💙💙🖤
ارد احشم وارد أنادي ابگلب مفتوت
بس منو ايحن اعله حالي ويسمع الصوت
حايطتني الغاضريه ابريحة الموت
وبس رماد الباقي منها ذيج البيوت
ليل غربه وگاع هيمه والعده امحوطيني
فارشيلي ارماد خيمه و الدخان ابعيني
وفوك هاي آلامي ... ضايعين ايتامي
و الجروح اهوايه
🖤💙💙🖤💙💙🖤
حايره و محد اليه ابگاع الطفوف
ليل و ابگلب اليتامه ياكل الخوف
گمر ليلي اعله الشريعه رأسه مخسوف
انعمت عيني ابسهم عينه وگمت ماشوف
انگطع گلبي وي جفوفه وگضت روحي ابروحه
هذا حالي لو يشوفه چا نهض بجروحه
ابكربله ابلا حامي ... ضايعين ايتامي
و الجروح اهوايه
🖤💙💙🖤💙💙🖤
مدري ادور عاليتامه الضاعوا ابليل
مدري من الگاع ارفعه السحگته الخيل
خيمه اسوي من عباتي للمداليل
كلهم امجلبين بيه امنين لي الحيل
الشمر سوطه لو اجاهم اشگف بچفيني
اگبال عيني عذباهم و آه يسطرة عيني
السوط رض اعضامي ... ضايعين ايتامي
و الجروح اهوايه
🖤💙💙🖤💙💙🖤
طفله لحسين افگدتها جانت اوياي
رحت ادوراها وشفتها اجروحها اهواي
گاعده يم نحر ابوها و اسمعت هاي
تگله يالعطشان اگعد اشرب الماي
بويه هذا الماي عندي ما اشربه ابدونك
من تشريه يطفه چبدي أي وحك عيونك
وصوت عمتي الدامي ... ضايعين ايتامي
و الجروح اهوايه
🖤💙💙🖤💙💙🖤
عالرباب اطلع و ادور واسمع النوح
اتصيح وين ابني اريده وگلبي مجروح
دللول الولد تنعه الولد مذبوح
در لبنها اعله عبدالله و درت الروح
اوياها اگعد ابچي يمه و احجي ويه الغالي
وين نايم ليش عمه عفت مهدك خالي
ابكربله يالظامي ... ضايعين ايتامي
و الجروح اهوايه
🔺 رابط الانضمام للقناة : @Alwaili2 🔺
تعليقات
إرسال تعليق