☜ بـسمـه تعـالى ☞
الـقصـيدة : رايحة العباس
اداء : سيد فاقد الموسوي
كلـمات :
❃❃❃❃❃❃❃❃❃❃❃❃❃❃
رايحه لعباس اعاتب رايحه
بنار تلهب وبمدامع جارحه
ارد اجعده بوني
نايم ومتهني
هواي فرگ اليوم عن البارحه
❃❃❃❃❃❃❃❃❃❃❃❃❃❃
رايحه ودم المدامع سايله او ويلاه اصيح
عتاب من جدمي لراسي محمله واعثر واطيح
ليش مو وياه اخذني ورحم دلالي الجريح
ترضه تجفيني الليالي وهوه نايم مستريح
واحرگوها اخيمي
هنا يلحمي ودمي
ويمه اصيح احاه وانصب نايحه
❃❃❃❃❃❃❃❃❃❃❃❃❃❃
ارد اذكره ابيت اهلنه هناك من نلتم سوه
انه اخيته الما هضمها وشوفي لعيونه دوه
مغمضه عينه وعمت عيني وريت لاشافت ضوه
تغيرت ذيج المعاني وانحرم شم الهوه
وايست يسكينه
جمد دم بعينه
الحلوه ذيج الجنت بيه مصابحه
❃❃❃❃❃❃❃❃❃❃❃❃❃❃
عاينت ماشفت رايه ولا ذكر للحومه اشوف
ولنهه رايه بعيده عنه مشگكه ويمها الجفوف
جا اسهام اللفت ليك شكثر ياذخر الطفوف
حسبك الله اعله الجرالك من حقد هاي الالوف
ماكفاهم نومك
مثلو بارسومك
ودوس باجدام الخيول الجامحه
❃❃❃❃❃❃❃❃❃❃❃❃❃❃
ايست من المعاتب عتبي جنك ماتفيد
الطعن سداها المسامع بيش يسمعني الحيد
ودو للشام البشاره بهاي خل يفرح يزيد
مات كلوله ذخرها وزينب تطگها العبيد
وجدموها اضعوني
لليسر يردوني
بنوگ هزله وناس تشتم جابحه
❃❃❃❃❃❃❃❃❃❃❃❃❃❃
وحاوطوني ازلام غربه ويمي جابوها الجمال
هذا اليطگني ويسبني وايد مجتوفه بحبال
ماشفت مثلك واشوفن حال امر منك يحال
تجيبني اشموس الرساله وترد بضعوني الانذال
من الدمع رك شوفي
وشتصير اجفوفي
اشگف وبيهن من الدم ماسحه
❃❃❃❃❃❃❃❃❃❃❃❃❃❃
خويه مجبوره خذوني وياك هذا آخر وداع
انه ذباني زماني بين طيات الضياع
الجبان يهين زينب حگه عگبك ياشجاع
ويا مره الجابت شبيك خضعت حته السباع
والگلب مو جاسي
حگي اطگن راسي
حيل بالمحمل وبالدم سابحه
❃❃❃❃❃❃❃❃❃❃❃❃❃❃الناشر رحيل القوافي الفاتحة إلى روح امي العزيزة وابوي الغالي واخواني سعيد وكريم وماجد ومحمد.وجميع اموات شيعه أمير المؤمنين عليه السلام 🕊🌿⚘💔 .........😭.👩🚀...................
تعليقات
إرسال تعليق