الدار الخالية من امي
ملا حميد التميمي
الدار الخاليه من امي تذبحني من اطب ليها
شلون اهجع واطبلها واگعد واستچن بیها
شلون بحالی ویه الدار وام البیت ماهیه
وطاحت خیمتی وذخري والبيت انكشف فيه
ياخذني الدرب لوعات وللحسرات رد بيه
اموتن من يمر عالبال طاري امي ومحاچیها
وشال ویه النعش گلبی وصارت سلوتی الونه
وشنهی من گلب عندی وجسمچ بیدی ادفننه
أيست وبعد هيهات طولچ بعد اشوفنه
وماشفنه الیموت یعود أيسي يالدفنتيها
ويريت الگبر طمانی ولا شفتچ یدفنونچ
وعساها بالعمی عیونی گبل لا تغمض عیونچ
واذا بالبيت ما الگاچ انامن شابگه اهدومچ
شلون بفرگتی ویاچ سفرتچ طولیتیها
ودعنه المحنه ویاچ بس بالیتم ردینه
وگفت اتعاتب ویه الدار بطرگ الصدی یحاچینه
عگب ملگاچ یم الخیر بس الهم طلع لینه
دخلت محاضن الحسرات وعيني الدمع غاطيها
يمر الليل بالحسرات وبالآهات اسهرنه
واصبح عالبجي والنوح والدمعات والونه
نفذ صبري بعد مكدر مجانج خالي اشوفنه
ذكرت ايام كعدتنه الويانه كعدتيها
وبعد مااشوف الي جاره لو ما الي رديتي
لاحمل واترك دياري يم كبرج لاحط بيتي
طك كلبي ييمه عليج علينه هواي جافيتي
وحتى بالحلم وياي طيوفج كطعيتيها
يم كبرج كضيت العيد يشوف عيوني يارجواي
وما اكدر على فكدج يفرحة عمري بدنياي
كومي نرد لهالينه يله امشينه كومي وياي
خلافج زينب بلا عيد من يوم الجفيتيها
يم كلب الحنين الجان كبل لانفز يفز بينه
طحنه اعله الكبر نصرخ ولا جنج تسمعينه
حسين من البواجي اعليج يايمه انعمت عينه
ويمه بيا وكت زينب تصيح وماتسمعيها
شلون بحالت اخواني وكلها تصيح مفجوعه
وياهو اللي اصدله كبلي يذرف ادموعه
ماداست الخيل حسين فراكج كسر ضلوعه
وما صابه السهم عباس عينه انتي عميتيها
كلمات الشاعر
اسألكم الفاتحة والدعاء للمرحوم والدي ولارواح المؤمنين والمؤمنات
تعليقات
إرسال تعليق