#للاربعين
زاير.. امشي عالجدم
زاير .. شايل العلم
زاير.. واهتف بألم
حبيبي ياحسين
زاير .. تجري دمعتي
زاير .. ثوره خطوتي
زاير.. وأنته دنيتي
حبيبي ياحسين
ــــــــــــــــــــــــــــــــــــــ
يحسين امحلفك بالچف والرايه
ارزقني ازياره ودمعه ومشايه
أيام الله أيامك يالضامي
قرآن ايسولف يذكر هالايه
قد قال واعدنا موسى 00 للشيعه هاي الاشاره
معناهه يوم اربعينك 00 واجب علينه الزياره
الـمثلك ديوانه فاتح بيبانه
والزهره اويانه الگبرك مولانه
حبك ياخذنه الگبرك مولانه
جنه .. تبقه كـربله
جنه .. إلنه نازله
جنه.. چنهه بسمله
حبيبي ياحسين
روحي.. طيره بالصحن
روحي .. حبتك لأن
روحي .. شافتك وطن
حبيبي ياحسين
ــــــــــــــــــــــــــــــــــــــ
بالموكب اخدم ليلي اويه نهاري
يحسين وجايبلك دمعي وثاري
يامذبوح الـمثلك عشنه ابخيره
ساترنه ابثوبك يالـميت عاري
واعله الطبخ لمن اوگف 00 الحسن فرحان اشوفه
ومن اتعب وتغفه عيني 00 راسي يمسحه بچفوفه
وياك أيامـي وماافل إحزامي
يمشن أجدامي إبدربك يالضامي
كل عام وأمشي ابدربك يالضامي
رايح.. احضن الگبر
رايح.. الطم الصدر
رايح .. باسمك افتخر
حبيبي ياحسين
شايل .. راية الصدگ
شايل.. منحر وسحگ
شايل.. راسي بالعشگ
حبيبي ياحسين
ــــــــــــــــــــــــــــــــــــــ
گبرك زاير من بيتي اتعناله
وايزور الله الزارك ياهنياله
واليوگف يم بابك تقره اعيونه
وتعرف شيريد وياحاجه اباله
وام البنين اعله بابك 00 تحچي بلسان المحنه
يامن عسن ما تعبتو 00 ياهله ابزوار اهلنه
إمعزبتكم آني احسين الخلاني
وبيكم وصاني كفيت إرداني
والرايه السفره كفيت ارداني
بيكم .. راسي مرتفع
بيكم.. شملي ينجمع
بيكم.. امن الگمر طبع
حبيبي ياحسين
صوتي .. اينادي ياهله
صوتي.. اتحبه كربله
صوتي.. بالفخر عله
حبيبي ياحسين
ــــــــــــــــــــــــــــــــــــــ
اتلگتنه ام العباس ولـمتنه
هالليله ابهذا المجلس حضرتنه
وياهه ابنيه وحيل ازغيرونه
ضعفانه وترجف كلش أذتنه
ازغيرونه بالگوه تمشي 00 كلش ضعيفه ونحيله
هاي الحلمهه تشوفك 00 هاي الابنيه العليله
وأسمع احبابك اتهوس يم بابك
تحلف بترابك ماننسى امصابك
اوداعت زينب ماننسى امصابك
أمشي.. وآنه هيجي احس
أمشي.. وحسره بالنفس
أمشي .. وإنته بالشمس
حبيبي ياحسين
يمك.. ألگه راحتي
يمك .. حلوه خدمتي
يمك.. تجري دمعتي
حبيبي ياحسين
ــــــــــــــــــــــــــــــــــــــ
والاكبر يم بابك بي حنيه
يستقبلنه امحزم بالخاچيه
يحچي اوي القاسم صوته اشمحلاته
وامبين شيخ وروحه احسينيه
الاكبر ينادي يجاسم 00 ياأبن عمي اريدك
الهاي الضيوف الاجتنه 00 إتفوّر الدله ابوريدك
والقاسم گلّه يالأكبر سهله
تأمر يااغله من راعي الدله
وامن الشايلهه من راعي الدله
حلوه .. فزعة الزلم
حلوه.. والله والنعـم
حلوه.. ابعيني تنرسم
حبيبي ياحسين
صوتي.. يعله للسمه
صوتي .. چنه ملحمه
صوتي.. ثوره قادمه
حبيبي ياحسين
محمد الجماسي
#اللهم_عجل_لوليك_الفرج
تعليقات
إرسال تعليق