✨خدمة محبي باسم الكربلائي تقدم:
📜قصيدة : جف اليصافح عباس
✒الشاعر : السيد عبدالخالق المحنه
📅: ليلة 6 محرم 1445
🕌: قاعة بغداد الكبرى - مكتب السيد الحكيم
چف اليصافح عباس
لو طاح ميطيح بتاره
علمنه الحسين نصير
خدام ونصير انصاره
والمو سهل نجيبه .. كل واحد بكتيبه
أنصاره
▪️▪️▪️▪️▪️
من عباس درس لهل العقيدة
ما غروه شمر ولا يزيده
گال انطيك ذهب مال ونزيده
عوف حسين واخذ كل التريده
وابو فاضل يگله يا شمر عود
ابو اليمه اشيريد نگله موجود
اذا رايد زند خل ياخذ زنود
واذا رايد عطش بس اترس الجود
هذا الشرف والقران
وهناك الاف عدوانه
صحنه فدائك يحسين
لبيك لبيك مولانه
بالمعركة الرهيبه .. كل واحد بكتيبه
أنصاره
▪️▪️▪️▪️▪️
صحبة موت ولا صحبة مصالح
غير حسين ولا نعرف نصافح
معذورين اذا نرفض نسامح
زعلانين ولا يمكن نصالح
خلص وكت الكلام نريد الافعال
ولا ردنه اصيلة نريد خيال
اذا نسكت لجل منصب والاموال
اكيده بالرگاب تصير الاحبال
يوم الشدايد غربيل
والناس اصناف وحچايه
قلة التظل ومتطيح
وتعيش وتموت وفايه
بأيامك العصيبه .. كل واحد بكتيبه
أنصاره
▪️▪️▪️▪️▪️
احنه اليوم نخط درب الكرامه
والما راد يجي ينصر إمامه
لا ميفيد صيامه ولا قيامه
عگب حسين فلا تبقى السلامة
بوجه واحد اجينه وماكو وجهين
مثل هاي الكرامه ما تصح وين
يهنياله الموت بحظن الحسين
واهو بيده الشريفه ايغمض العين
تأمرنا يا تاج الراس
خدام لتراب اقدامك
يشهد علينه العباس
ابطال ونموت گدامك
والمعركة قريبه .. كل واحد بكتيبه
أنصاره
▪️▪️▪️▪️▪️
لعنة عاد على وجوه الخيانه
واحنه نطيح لجل نرفع لوانه
ننطي ارواح ولا ننطي الامانه
طعنة سيف ولا وردة بإهانة
چبيره الدنيه هاي بعين الزغار
زغيره وهم رخيصه بعين الكبار
علي فراشه حصيره وهو كرار
بقت للما يتبعه الخيبه والعار
صارت وابن ظاهر صاح
يا جون يبرير وهلاله
نافع يـ عابس وزهير
ما اريد عالخيل خياله
من عرفوا المصيبة .. كل واحد بكتيبه
أنصاره
▪️▪️▪️▪️▪️
اهل السيف واهل خبره ودرايه
مشتاگين هلا بسوح المنايه
احنه دروع لبو اليمه وحمايه
صح سبعين لچن بينه الكفايه
ركضنه اعله العساكر ركضة سباع
تماسكنه سفينه وعابس شراع
وگع جون براحه وبعده فزاع
يگول بساع اركضوا عليهم بساع
واليوگع بشده يصيح
عباس عباس ها وينك
مثل السهم يوصل ليك
زعلان ويصيح عد عينك
فزعة زلم عجيبه .. كل واحد بكتيبه
أنصاره
▪️▪️▪️▪️▪️
ملهوفين واجه يوم السعادة
عدهم موت لچن عدنه ولادة
قبل الموت نشم عطر الشهادة
حب حسين شرف واعظم عبادة
اذا صارت عدد احنه قليلين
أهم سبعين ألف بس احنه سبعين
على الواحد الف ونگول راضين
واذا ضعف العدد هم مستعدين
نفس الفعل شيب وشاب
احرار والموت شارينه
حتى الوصل للتسعين
هم عاد لأيام عشرينه
والشيبه والشبيبه .. كل واحد بكتيبه
أنصاره
▪️▪️▪️▪️▪️
طخ الراس ابو النفس الذليله
والوفاي رفع راس القبيلة
هوسه نريد على باب العقيلة
خل نشوف مواقفنه الثگيلة
نهوس للعقيلة هوسة اصحاب
ابو اليمه أمانه بهاي الارگاب
نموت وخلهم يسلبون الثياب
ضحايه ومن نطيح يظل الحجاب
عفنه الاهل عفنه الدار
جيناه ارواح ملهوفة
مو مره لو متنه امرار
والله والله منعوفه
لا تحزن الحبيبه .. كل واحد بكتيبه
أنصاره
▪️▪️▪️▪️▪️
#اللهم_عجل_لوليك_الفرج
◇◈◇⇩..تابعونا..⇩◇◈◇
📜 القصيدة: عذراً يا زهراء 🎤 أداء: محمد الخياط ومحمد فريدون 🖋 كلمات: ابو جعفر العبودي ~~~~ زهراء مدد زهراء مدد ~~~~ يا زهره بالروح جلمه سمحي اناديج يمه .. عذراً يزهراء عايش على خير حبج مذنب وانه احتاج گربج .. عذراً يزهراء يالزجيه .. لا تطرديني لحظه اسمعيني .. عندي كلام جمره بيه .. حبج يزهره بس انه انظره .. برد وسلام ~~~~ يم بابج اليوم واگف بس انه خجلان خايف .. عني تصدين ماظن اذا جيت نادم ما انحسب ليج خادم .. عني تصدين كل حياتي .. بين المجالس وسوادي لابس .. راجي القبول امنياتي .. يكثر جنوني ويلقبوني .. عبد البتول ~~~~ يالتعبي وياج يسوه يالعيشتي وياج حلوه .. خليني بحماج كل منبر عليج ينعه اگصدله ملهوف واسعه .. خليني بحماج دامي صدري .. وتبگه العلامه اليوم القيامه .. دمي يسيل وانه عمري .. لجلج اسلمه وكل الاقدمه .. ادري قليل ~~~~ كل حاجه تگضين ادري وانتي تجبرين كسري .. لا ما تقصرين تدريني محتاج امنج لو اطلب هواي منج...
تعليقات
إرسال تعليق