الله يعين دلالج يزينب
شفت خيام بيها النار تلهب
والخيل اعله صدر احسين تلعب
__
زينب تراني ام الحزن يدمي الكلب مصابي
شحجي وشسولف يا خبر من محنتي وعذابي
ماضل والي بكربله المن بعد عتابـــي
ومجتله كل اخوتي ومدفنه شبابــي
على الدار __ دهري وكربله وضالم على الدار
ملعون ويشب بخيامي النار
بالهيمه شردنه وصار طشار
*
شفت الحسين ابذبحته الدنيا انطفه ضواها
داست حوافر عالسبط ضل ينسمع صداها
ماضل ضلع ما منكسر جثته تصب دماهــا
صدره انطبك وي الكفه ودم امطرت سماها
اويلا _فوك التل صحت خويه اويلا
ماضنه عدل من غارت اعداه
بتروا خنصره واتسلب ارداه
****
عباس اصيح بغربتي مارد جواب عليه
ترضاها ياخويه الكمر زينب واروح سبيه
ضربوني بصياط الحقد سموني خارجيه
راسك على راس الرمح للشام خذوه هديه
حرامات_ طايح يابو الغيره حرامات
وبنص الخرابه اعيالك تبات
جم واحد فكدنه وجم طفل مات
*
فوك الهزل ومكيده وسح الشمر عباتي
راح الستر يابو الفضل وتفرهدت حساتي
من الضرب ماضل متن حتى انهض الصلاتي
كل ساعه اعثر ونهطر حبلي بحبل خواتي
بالحبال _بتمن انه حتى انجر بالحبال
اصرخ وين يهلي وماكو ارجال
تحدي بضعني ضلت بس الانذال
*
يوم الظفر زينه وفرح جي ذبحوا الغوالي
راس الحسين اعله الرمح ويعاين اعله حالي
ينضرلي وايات الكهف رتلهن وبجالي
عالراس _كمت الطم واصيح انه على الراس
بديوان الرجس تنضر عليه ناس
تمنيته عدل ويانه عباس
*
الشاعر علي حسين المنصوري
تعليقات
إرسال تعليق