عمرك صبي علمك نبي محمد الجواد
مر الخليفه وانذهل لحضتها هربو ا جم صبي
بس انته كنت بهيأتك وقفة وصي بهيبة نبي
يسمع فصاحة كلمتك خلت افكاره تنسبي
هاي الرزانه اليانسب جاوبته آنه الطالبي
والطاغيه والحاشيه مستغربه المراد
عمرك صبي علمك نبي محمد الجواد
*****************
حقهم لون يابن الرضا كل شخص بيهم ينذهل
بالاعلميه الكامله بس بالعمر عمرك طفل
تتبين اكثر معجزه بالصعبه كلما تنسأل
ضم راسه ابن اكثم لمن شفاك ميزان العدل
حجيك ذهب دربك وجب بوابة العباد
عمرك صبي علمك نبي محمد الجواد
**************
قاضي القضاة ومجلسه ظل من كلامك مرتبك
قران ناطق عالارض بيك البلاغه والسبك
مذلول دنك من سأل كلمن بعلميتك يشك
واصبح مثل خادم الك حتى الملك ماجن ملك
من هيبتك ولنصرتك رب العرش اراد
عمرك صبي علمك نبي محمد الجــواد
*************
ينعقد جم مجلس الك جان ابمواضع تختلف
جفت جميع الاسأله بس انت علمك مايجف
عجزوا وقالو ننسحب عد المجالس صار الف
بيك العلم والمعرفه اصبح عدوك يعترف
اهل الفتن طول الزمن صاروا مثل رماد
عمرك صبي علمك نبي محمد الجــواد
***************
خطت بني العباس الك عدة سياسات وظلم
زروا عيون بكل درب بس ماغفيت اعله الهضم
شافوا حربهم خاسره كلما يعدونك خصم
قاعد بخوص ونزلت تحت القدم كرسي الحكم
والضدتك من رفعتك ظلت بلا رشاد
عمرك صبي علمك نبي محمد الجواد
***********
جان الخليفه بكل وكت رايد يوقعك بالحيل
قلت الحيله وماقدر صبرك ولا اي لحضه قل
حتى من اجاك الهاشمي قال اغتيالك محتمل
تدري بنوايا ام الفضل بس انت مؤمن بالاجــل
قلبك لهج موتك فرج من دنية الســـواد
عمرك صبي علمك نبي محمد الجواد
***********
بائت خططهم بالفشل ظنو بقتلك تنحسم
كل عقله فكرك ينتهي تبت ايدين المعتصم
قتلك كرامه وللابد صورة خلودك تنرسم
يابن الرضا وعبر الزمن تضحيتك تخضر زلم
وبحضرتك كل شيعتك هاليله بالحداد
عمرك صبي علمك نبي محمد الجـواد
*************
الشاعــــــر
زين العابدين المرياني
ليالي استشهاد الامام محمد الجواد عليه السلام
العتبة الكاظمية المقدسة
ليلة28ذو القعده1443
تعليقات
إرسال تعليق