في رثاء الإمام الجواد عليه السلام
ناح اِلحمام اِلشباب الأَيِـمَّـه
ناشِـر جَنَاحه اوْ يحُوم اِعْـله جسمه
نسـمـع هديله دمعه يسيله
ـــــــــــــــــــــــــــــــــــــــــــــــــــــــــــــــــ
للجواد اِشچم جَـنَاح اللي تكسّر
چم حَمَامه ابْحِزن دمْعَـتها اِتحدّر
او حين شافـت عالسَّطِح خدّه تعفّر
گامت اِتظـلّل عليْه او فوگه تِـفْـتَـر
إبن الرّضا عالسَّطِح شفته من مات
رفـّـت على راسه سَـبْـعَة حَمَامات
او كلمن يجيله دمعه يسيله
من أرض مكّه ابْجَـناح اليستعـر نار
شاهَـدِت أوّل حَمامه گِصْـدَت اِلدّار
إِلْحمامه الچانت اِوْيه الهادي بالغار
للجـواد اِتْـعـنَّت او مدمعها مدرار
عُـمْـر اِلحمامه مِن اِلهجره يِمْـتَـد
تبدي ابمحمَّـد و تِـنْهِـي ابمحمَّـد
ابساعة رحيله دمعه يسيله
و الحَمامه الثانيه اِتعـنّت حزينه
گصْدَت اِلدار الجواد اِمْن المدينه
جابت اوياها دمِع بضعة نبينه
او مرِّت اِبْگـبْـر الحسَن جابت ونينه
منّ المدينه حَمَام اِلّلي گاصِد
جايب أمانه مِنَ اَرْبَـع مراقِد
يسعـر دِليله دمعه يسيله
و تالي بِـدْمُوع الأرامِـل و اليـتـامه
وصْلَت اِمْن أرضِ النّجف ثالِث حَمامه
للجواد اتخاطبه اِبحسره او ندامه
اتْگِـلّـه جَـدّك علي يـبـعـثـلك سَـلامه
بعدَك شباب او تجيـك المنيَّه
عُـمْرك يذكرني عُـمْـر الزچيّه
ابونّه ثجيله دمعه يسيله
او حين طاح اعله السَّطح وايدير بالعين
گصْـدته رابع حمامه ابساعة البين
إجت تـنـزف بالدّمه من الجَـناحين
هيّه هاي اِلچانت اترفرف عله احسين
من كربله هالحَمام اِبْـمناحه
سافر عگب ما تخضَّب جناحه
بالدَّم مسيله او دمعه يسيله
و الحمَامه الخامسه ابهاي الرزيَّه
هـيّه أوْلـه بالحزِن من اِلبَـقـيَّـه
هـذا يـومـك يا حَمَام الكاظميَّه
باِلشمس إبن الرَّضا طايح رميَّه
واجب تجي يمّه و ابهمَّه تحضر
و اتوَاسي بالدمعه موسى اِبْـنَ جعفر
موسى إِلنَزِيله دمعه يسيله
او رغم ما عنها الدرُب طال او تِـبَعَّـد
إجت مِنْ يَـمْ گبْر أبُـوه اِليوم تشهد
إِلْحمامه السادسه مَـوْطـنها مشهد
من أبو امحمَّد إجت تحضر مُحـمَّـد
شفنه الحَمامه تعنَّت كئـيـبه
جابت رسالـة حبيب اِلحبيبه
أرسَـل عـوِيله دمعه يسيله
و الحمامه اِلْوصْلَتِ ابآخر المأساة
تختلف رحلتها عن كـلِّ اِلحَمامات
من گبُـر زينب إجت تطوي المسافات
امن الغريبه للغريب اِتجيب دمعات
اِتْگـلّـه يعمّه صُـبَح حالي حالك
بالغربه محّد إجالي او إجالك
جفْـن العقيله دمعه يسيله
الميرزا عادل أشكناني
" قم المقدسّة "
20 / 9 / 2014 م
https://t.me/mirza_adel_ashkanani
تعليقات
إرسال تعليق