📜قصيدة : امهلني
✒️للشاعر : السيد عبدالخالق المحنه
💽اصدار : محرم 1445
انا والموت واللحظات تمر مثل السهم واسرع
گلت حتما يجيني حسين اخويه بوگعتي يفزع
شخص قادم عليّ حسيت وانه ما اشوف بس اسمع
صحت لو جاي تگطع راس احلفك بالتعبده ارجع
لحد ما اودع المحبوب واشبگه وروحي خل تطلع
▪️▪️▪️▪️▪️
إمهلني بس لحظات واگطع وريدي
خليني گبل الموت أشبگ عضيدي
هذا الأريده .. موتي اعله إيده
لا مو بعيده .. يتمدد أوياي
▪️▪️▪️▪️▪️
نسيت جروحي وچفوفي
صرت من عيني أتألم
أنا عيني سهم بيها
والأخرى جف عليها الدم
بعد بيمن أشوف حسين
و بيش أنظر للمخيم
أأشر بيش ماكو اجفوف
وانا إبشوفة أخوي أحلم
بخيامي أسمع صوت شو ماكو رايه
لو طايح العباس باجر سبايه
من صاحت إختي .. طاحت دمعتي
صعبه رجعتي .. لا جف ولا ماي
▪️▪️▪️▪️▪️
عرفنه اليوگع ابشده
يتاني فزعة إخوانه
وانا عندي أخو واحد
وحيد ابين عدوانه
يحال الضامي من ينظر
نهر وعياله عطشانه
أخوي و طلبتي امن الله
أموتن فوگ ذرعانه
شتعذر امن حسين لمن يجيني
ويمينه بالتوديع تعذر يميني
قبل المنيه .. ابن الزجيه
يرضه عليه .. واتفاخر ابهاي
▪️▪️▪️▪️▪️
أحس ابآخر أنفاسي
شخص يگرب گلت هوه
صحت يحسين انت هنا
بچه و بين حجي الخوه
أخوك آنه يبو فاضل
إجيتك ظهري يتلوه
بعد ما بيه حيل أمشي
واشيل أجدامي بالگوه
لاتبجي خويه أرجوك تلجم جروحي
والله الدمعتك هاي أفديها روحي
لايجري دمعك .. واسمح أودعك
همزين أسمعك .. خلتني دنياي
▪️▪️▪️▪️▪️
كسر گلبي ونين حسين
يريد إيگوم ما يگدر
صحت خويه العده يشوفوك
ولا تضعف يليث البر
عليه إتسند من اتگوم
أموت ولا يصيبك شر
دوس إبسهم الـ بعيني
المهم تنهض يبو الأكبر
عيني السهم يحسين غمضها اليه
وبلا إدين اشلون تسبل إديه
واعرف سؤالي .. يجرح يغالي
هذا الجرالي .. سامحني مولاي
▪️▪️▪️▪️▪️
وداع حسين ألمني
بقه أوداع الـ عليّ أصعب
ألف گطعة زند أحمل
ولا أنظر دمع زينب
أنا الگلتلها گومي اوياي
و عفتها بالخيم تنحب
وديعة والدي وسفه
بعد لحظات تتسلب
حتما تجي باليل بس مو أميره
وتگلي يالعباس أختك أسيره
والدمعه تجري .. نار اعله صدري
ما يكفي عذري .. جرح السبي هواي
▪️▪️▪️▪️▪️
#اللهم_عجل_لوليك_الفرج
◇◈◇⇩..تابعونا..⇩◇◈◇
خدمة محبي باسم الكربلائي
تعليقات
إرسال تعليق