يرتاح خلوه : محمد بوجبارة
دمي سد عين المهر من كثر الجراح
ظنه رايح للخيم بس للعده راح
من تگطعني السيوف .. ريت أبويه ما يشوف .. مقتلي
من جره دمي اعله مهري وسدها عيناه
صحت الله ايعين أبويه بالي وياه
لو نظر هالطبره خايف موته
والأشد من هذا مهري ضاع مسراه
يركض ودمي يصب .. چنه يركض هالگلب
وآنه اگله هالدرب .. مو درب الخيام
وانته تدري بالأمر .. عندي والد ينتظر
لا تگصرله عمر .. من گبل السهام
يامهر صوب العده يا ريت متروح
آنه روح الوالدي رجع إله الروح
لا تزيد له آذاه .. كافي بالعاشر تراه .. مبتلي
اعداي إجت وآنه اصرخت بس ما يسمعون
بالسيوف وبالرماح أدري اشتريدون
ويا جسمي گلب أبويه لا تگطعون
ابعيد إخذوني وبعد سووا التسوون
كل فرد ليه گصد .. شنهو ما عنده ولد
او نوه ايضربه أحد .. يتراكض اعليه
العين أبوي آنه الضوه .. ايضمني من هب الهوه
ومن تضربوني سوه .. چنه الضرب بيه
ردوا اعليه الذبحتك كلنه ناوين
من نذبحك ردنه نحرگ گلب الحسين
انريده ينحب بالمصاب .. وگلبه يبگه بالعذاب .. يغتلي
اسيوف كثره الگطتني وشگت الثوب
والتراب التحتي كله ابدمي مخضوب
اشلون ينظرني أبويه وآنه مصيوب
ابعيني صورة وجهه ذابل كله متعوب
وصوره مابين الصور .. إيد أبويه اعله الظهر
وصرخ صرخه امن القهر .. بس لا تضربوه
اشويه خل ياخذ نفس .. بالدمه وجهه انترس
يا بشر مو كافي بس .. يرتاح خلوه
وآنه اگلهم مو گلت إخذوني لبعيد
گالوا احسينك نريده ايشوف وانعيد
وسيف يضربني اعله سيف ..والضحك منهم يحيف .. يعتلي
اعداي من كثر الضرب سوني أوصال
وآنه احس موتي گرب من هاي الأهوال
اشتگت اشاهد أبو الأكبر گبل الآجال
صرت أنادي يا حسين أدركني بالحال
من صحت باسمه فزع .. وآنه أدري من طلع
هوه چم مره وگع .. مابين عدوان
اشكثر طاح اعله الأرض .. مدري ظل عنده نبض
خوفي يتعب بالركض .. وادريه عطشان
اينادي من ابعيد إلي هسه الأبو ايجيك
لا تموت الخاطري خل أنظر اشبيك
كلشي من ييني ضاع .. او يا علي حلم الوداع .. ظل إلي
الصدره ضمني من وصل وايجرها ونات
او نام يمي عالترب وآنه احسبه مات
يصحه مره ايشوف حالي ايموت مرات
گلي ما اگدر أعوفك إنته بالذات
بيه يالغالي عشت .. لحظه عني غبت
تالي بالطف ألتفت .. ما اشوفك اشلون
اعليك آنه اتعودت .. وتدري يوليدي ردت
ننذبح نفس الوكت .. وابمصرعك كون
كون أموت اوياك يبني اشگد تمنيت
وبس گبر واحد يلمنه يا علي ريت
إنته إبني وكل هواي .. وانظرك بالدنيا هاي .. كل هلي
گمت أنازع بين إدينه وگلبه مفطور
ويا طلعت روحي عينه كامت اتدور
هذي لحظاتي الأخيره ويختفي النور
وصار آخر شي أشوفه احسين مكسور
اكسرت گلبي دمعته .. اشگد تألم حالته
إبگه يمي صرخته .. يوليدي أرجوك
صعب مثلك أفگده .. احسين منهو ايساعده
كافي موه بالطف العده .. جدامي ذبحوك
ضمني وايگلي اشكثر راح أبگه مشتاگ
وآنه اگله أعتذر مو حان الفراگ
روحي طلعت بين إديه .. واسمع اينادي ابچيه .. يا علي
تعليقات
إرسال تعليق