أول العشرة | محمد بوجبارة كلمات مكتوبة

قناتنا على التلغرام

غير القميص المنخضب بالدّمه

هالليله شنهو الينّشُر بالسِّمه !؟
اشتنشر الزّهره ؟ .. ابأوّل العَشره
ـــــــــــــــــــــــــــــــــــ
بداية محرّم .. 
تخيّم عالبشر حالة كآبه
او نواعي الزچيّه ..
تجي يم بيت عيني او تدِگ بابه
تفزّز دموعي ..
تگول ابني بِدَت عَشرة مُصابه

تنشر الزهره قميصه بين آفاق السّمه
و القميص امخرّگِينه او كل كتر يگطر دِمه
يالله يا عيني استعدي هذا شهْر امحرّمه
او بعد مدري ابهالليالي شراح تنشر فاطمه !؟

الزهره ابحزنها اشتنشر اعله المَله ؟
و اشچم قميص العدها من كربله ؟
اتجدّد الذِكره .. ابأوّل العَشره
ـــــــــــــــــــــــــــــــــــ

أهيم ابخيالي ..
و أنا ابعين البصيره انظر حِزنها
كأنّها الوديعه  ..
انشرت ثوب آخر او متعالي وَنها
قميص الكفاله ..
مهو العباس هم حسبة إبنها !

مثل ما يوم القيامه تنشر اچفوف الگمر
الليله هم تنشر قميصه الناگع ابماي النهر
بس قميص ابلا ردِن من صوب ذرعانه گِصَر
و اعله صوب الگلب لي هسّه السهم تارك أثَر

الْعامود خضّب ثوبه من ضرْبته
و ابصدره لي هسّه أثر جرْبِته
او فاطمه اتنظره .. ابأوّل العَشره
ـــــــــــــــــــــــــــــــــــ

عگب ما تضمّه ..
قميص الكافل او ثوب الأخوَّه
انْشرَت بالبواچي ..
قميص او ثوب بي رِيح النبوَّه
علي لو محمَّد ؟ ..
علي الأكبر قميصه ابدَم تروَّه

أمِس أم الحسَن طلعَت ثوب أبوها تنشره
او خلّو بِن عمّي تنادي و الضلوع امكسَّره
اليوم ويْ شبْهِ النبي ردّت فعلها اتكرّره
لَجَن ثوب الأكبر امخضّب ابدَم نحره الجِره

من تنظر الثوب إربًا إربًا صِفه
تناديه بعدَك عله الدنيا العَفه
مقتله تِقره .. ابأوّل العَشره

ـــــــــــــــــــــــــــــــــــــــــــــــ

الزچيه لوِلٍدها  ..
ما زالت تجر ونّه اعله ونّه
انشرت عالبريّه ..
قميص لْشاب عمره اثنعش چَنّه
لچن و العجيبه ..
قميصه اعليْه باقي أثر حِنّه

هاذي أثواب الحسَن ورّثها للقاسم ذخُر
بِيض چانَن بالمدينه ابكربله صارَن حُمُر
اعليها مشتبكه الهنادي و المواضي و السُمر
اشسوّت الطعنات بيها او ما بقه سالم كتُر

أم الحسَن تبچي اِعْله شِبْل الحسَن
ثوب العرس متفصّل اعْليه چفَن
زفِّته لگبره .. ابأوّل العَشره

ـــــــــــــــــــــــــــــــــــ

عگب هالرّزايه ..
بعد شنهو الذي عِدها او تنِشْره
اوْيه رَجفة إديها ..
تطلّع ثوب بس حيَّرني زغره !
أثاري اعْله چفها ..
اِگماط لطفل ستِّ اشْهور عُمره

منهو يگدر ينظر لهالمشهد ابعين الگلُب
اگماط من صوب النّحَر متصوِّب او دمّه يصُب
اتنادي يا هالناس طفلي شنو ذنبه او ينطلُب
اتجدّد اعلْه أم الحسَن طيحة المِحسِن عالتُرب

ها يالمحُب حظَّر ادموعك نهَر
و الزهره عِدها فاتِحه ابهالشَهَر
أوَّل العَبره .. ابأوّل العَشره

ـــــــــ
ميرزا عادل أشكناني
المستشفى الأميري / الكويت
ذو القعدة 1443 هـ

https://t.me/mirza_adel_ashkanani