ياعباس اجيت انخاك | محمد الجنامي | تراث المحمره |كلمات مكتوبة

 

📜 قصيدة :- ياعباس اجيت انخاك .
✍ كلمات :- الشاعر المرحوم الشيخ ابراهيم الديراوي .
🎤 أداء :- الرادود محمد الجنامي .

🔶◼️◼️🔶◼️◼️🔶◼️◼️🔶

ياعباس اجيت انخاك .. ياعباس رد اجواب
ياعباس كورت الهموم .. واجيت الك بعتاب

🔶◼️◼️🔶◼️◼️🔶◼️◼️🔶

يا عباس ماني اختك واعتبك يالكلت كومي
ابذمتي وجيت من طيبه وياك وتزهي انجومي
يا عباس ريت اتشوف هظمي وكثرة اهمومي
اهمومي العلي لو صبت عله يذل تلاشه وخاب

🔶◼️◼️🔶◼️◼️🔶◼️◼️🔶

اهموم العلي هم فركاك همي وهم هظم حالي
وهم فكد اخوتي وفكد الدلال الجان يبرالي
جيت امن الخيم عباس الك والنار بذيالي
ماتكعد تكول اختي العزيزه اصبحت بين اجناب

🔶◼️◼️🔶◼️◼️🔶◼️◼️🔶

يا عباس يالردتك ذخر للضيج يجفيلي
ردتك گمر يا عباس من يظلم علي ليلي
نعم الذخر لاجن غاب مني الگمر يا ويلي
اظلم ليلي ولعب بينه الدهر يهل الشيم دولاب

🔶◼️◼️🔶◼️◼️🔶◼️◼️🔶

يا عباس يا صيوان خدري البيك محجوبه
يالبيك السلف مامون واهله البيك مهيوبه
حتى الشمس لو رادت عله الحي تمر مرعوبه
من هيبتك يالعگبك خواتك بعد ماتنهاب 

يــــا عـــــبــــاس ... يــــا عـــــبــــاس

🔶◼️◼️🔶◼️◼️🔶◼️◼️🔶

تدري الحرم من تنهاب خويه ابجال ولياها
ما تنهاب يجفيلي اليسيره ابولية اعداها
عيني الما بجت عباس تالي الوكت بجاها
تبجي ابدم عليك العين ما تبجي ابدمع سجاب

🔶◼️◼️🔶◼️◼️🔶◼️◼️🔶

صدك يالعفت زينب زينب ما تهبط الراس
ما ابجي واهل دمعي وتتشمت ابحالي الناس
خاف الوادم يگولون ذلت من عگب عباس
ما ذل ارفعت راسي ومن عندي الامل ماخاب

🔶◼️◼️🔶◼️◼️🔶◼️◼️🔶

تخيب الما وفه ليها اخوها وتظل تتهظم
وانته المن وفاك الناس يا عباس تتعلم
من يتقدم التاريخ انته اعليه تتقدم
واسمك علم يحسبله الزمان اليمر الف حساب

يــــا عـــــبــــاس ... يــــا عـــــبــــاس

🔶◼️◼️🔶◼️◼️🔶◼️◼️🔶

اخوي انت وكفو ونعمين يالبيك ارتفع شاني
أعلى من النجم راسي رفعته ابين عدواني
وفيت ابوعدك الزينب حميت حدود صيواني
والعدها اخو مثلك عدها بكل ثنيه اكتاب

ياعباس اجيت انخاك .. ياعباس رد اجواب
ياعباس كورت الهموم .. وجيت الك بعتاب
     يــــا عـــــبــــاس ... يــــا عـــــبــــاس

🔺 رابط الانضمام للقناة : @Alwaili2 🔺