فهمني محمد الجنامي كلمات مكتوبة

 

فهّمني أرْد أفتَهِم .. بيش اوْصِف او تِنْوصِف
يالسرّك المسْتَـتـِر .. لي هسَّه ما منكشِف
ليش إنته دون البشَر .. عشْگك عِشِگ يختلف

———————

جيت لدار معرفتك او ما أدري أفوت اِمنين
او شِفْت الدنيه كلها أوْهام بس إنته الصّدگ يحسين

عِفْت اِبهذا العالَم كلشي .. او سلَّمْتَك دنياي اْو دِيني
امْغمّض عيني او خلَفك أمشي .. وين اتودِّيني , ودِّيني

إيد ابإيد .. ما عُوفك
واسْتَجْديت .. معروفك
حَبْلُ اللهْ .. بچْفوفك
لا اتْخلّيني

غيرك يبِيع الحچِي .. او وكت الفعايل يزِل
بس إنته يا بو علي .. من تحچِي گول اْو فعِل
حاشه اليحبَّك خِسَر .. عشْگك عِشِگ يختلف

———————

تشبه جنَّة الله ابحيث وصفك مو حچِي او ينگالْ
لا عين الرّأت مثلك و لا حتّه التُمُر عالبالْ

الوادَم هالگدِّ ايحبّونك .. و محّد منهم عارف گدرَك
چا لو يحسين ايْعرفونك .. راحَوْا فدوه لحافر مُهرَك !

بيك الناس .. مجنونه
او سرَّك ما .. يدرونه
بالأرواح .. مكنونه
چِلمة سرَّك

الوادِم تدوِّر ذهَب .. بس آنه أدوِّر فِهِم !
لو عندي منَّك حرُف .. چِا بيدي نْلتِ النَّجِم
عن كل عشِگ بالدَّهَر .. عشْگك عِشِگ يختلف

————————

مشاعِر حزني بالدلّالْ  مو مالت عَشِرْتْ أيَّامْ
او حالة مَعْنَوِيتي اوْياك  لا يقظه ولا أ حلامْ

بعض الإحساس العِرفاني  .. ما يتَّرْجَم إلّا ابونَّه
استشعر طعمه ابوجداني .. بس مدري اشلون أحچِي عنَّه

هالإحساس .. يتجسَّد
بالدّمعات .. فوگ الخد
او هذا الثوب .. الأسوَد
يكشف حِزنه

حزّنك يدوّر گلب .. ما يحزن لْدِنْيِته
او يشبه بَيَاض الثِلج .. من تنظر لْنِـيِّته
أحچِيها بالمُختَصَر : ..  عشْگك عِشِگ يختلف

ـــــــــــــــــــــــــــــــــ
[ فهَّمني ]
ميرزا عادل أشكناني
ذو الحجّة 1443 هـ
قم المقدّسة

https://t.me/mirza_adel_ashkanani