خطوات العلويات من سمعوها
گامو موته بَلا روس وتلگوها
وصاحت كربله
هله زينب هله
وتلگوها
...
من يوم المشت لليوم تمشي الروس وياها
من راحت بذيچ النوگ
بچه النوگ ممشاها
من طگها الشمر بالسوط طاحت روس ولياها
زينب باوعت عالروس والعباس ما جاها
من رمحه يصيح بصوت زينب شوفي
من بعدي اعله الايتام صيري چفوفي
واحدي القافله
هله زينب هله
وتلگوها
...
طِلعو من تراب الموت منحر يبچي يم منحر
لزينب گامو بلا روس
بس اجساد تتعثر
حسين اعله التراب يطيح
بالله اتصور المنظر
طاح وزينب اخته تصيح
خويه اسم الله ابو الاكبر
مسحت عن نحره تراب وتشم نحره
وتتلفت خاف اخيول تسحگ صدره
بنحره اتقبله
هله زينب هله
وتلگوها
...
زينب شافت العباس
الچان الها هوه الريه
راد يسلم اعله اخته
بس چفوفه ما هيه
اشلون يشوفها بلا عين
عينه بسهم مطفيه
گال اشلونچ وگالت
اشلون التمشي مسبيه
اشلون الوگفت بالسوگ ومچتفيها
ماعندك عين اتشوف شصاير بيها
ردت ناحله
هله زينب هله
واتلگوها
...
يسأل عن رقيه حسين
ليش بنيتي ما جتني
اني ادري حنينه هواي لو موجوده شبگتني
آخر مره برض الشام
راس بطشت حضتنتي
گالت بويه من السوط
شوف شصاير بمتني
زينب ليش تدنگين لا ياخيتي
دامج رديتي بخير فدوه ابنيتي
ملگانه حله
هله زينب هله
وتلگوها
...
صاحت صوت يالخوان مشكورين يعيوني
بس روس وطلعتو وياي وتفيون لضعوني
رديت وعصي الجمال مكسورات بمتوني
بالعِشره احلفكم
وي الروس ادفنوني
هنا صاحت كل الروس ما قصرتي
بخوان بلا خوان زينب انتي
يرباة العُله
هله زينب هله
وتلگوها
...
خادم الحسين ( عليه السلام)
كرار حسين الكربلائي
( ابو كميل )
نسالكم الفاتحة لروح المرحومة الشابة نرجس تحسين
تعليقات
إرسال تعليق