يالثوبك مسلبينه
أداء | الملا دانيال بوجبارة
كلمات | محمود الموسوي - كرار حسين الكربلائي
محمود الموسوي
جيتك كوم خويه حسين ليش تغمض عيونك
شفت الخيل تسحك بيك جنهم ما يعرفونك
انه ادري العطش يحسين غير وجهك ولونك
رملهم حار وتغطيت بيه عن لا يسلبونك
سولفوا بينه والسالفه جروحك
طلعت سكينه من طلعوا روحك
حرم يحسين ظلينه .. يالثوبك مسلبينه
....
باجر وي غرب يحسين ونضيع معارفنه
لاتغتاض هو السوك باجر كله شايفنه
بعدنه نسولف وذبحوك ماخلصت سوالفنه
ودمك بعده بجفوفه واجه الذباح جتفنه
جابني الحافر بيه ريحة هدومك
وتعنيتك جا وين رسومك
حرم يحسين ظلينه . . يالثوبك مسلبينه
....
باجر من ندك بيبان نكسر خاطر الزهره
نجهب ناس موش نضاف وكصصهم ولاكطره
الماشايل وفه العباس مايفهم حجي الكمره
الخيل الماركبهه حسين عميه وداست بصدره
وهاي نسوانك بالسوك تاليهن
وين ما راحن ينجاب طاريهن
حرم يحسين ظلينه . . يالثوبك مسلبينه
....
ماتعبر سفينة نوح لو طوفانهه بدمك
خل اشبع شبك يحسين باجر خاف ما اشمك
باجر تنسحك ويدوس حافرهه بحليب امك
ويسمونك المذبوح يمن فدوة رحت لاسمك
حسين حاجيني وكلي شكد نازف
دمك واصل للخيمه وناشف
حرم يحسين ظلينه . . يالثوبك مسلبينه
....
يالعاشكني وأحنه زغار انه لهسه عاشكتك
شفتك بالحلم مذبوح وأمي الزهره شابكتك
عبالي الحلم جذاب ثاريني صدك شفتك
جسمك والله ماينشال لو ينشال جا شلتك
مغمض وصاحوا ذوله اليذبحونك
ها خفت زينب تنشاف بعيونك
حرم يحسين ظلينه . . يالثوبك مسلبينه
....
كرار حسين الكربلائي :
كل حرمه إذا جان الاخو يمها...يا با الفضل كل الناس تحشمها
معروفه الإخت لو جان إلها إخوان...الغريب يهابها وبالدهر ماتنهان
منو يصدقها زينب توقف بديوان...مجتوفه ابحبل و ايزيد يشتمها
دمعة عتب بعيوني يراعي الجود...شفت موقف ويا ريتك جنت موجود
اشفاف حسين قاموا يضربوها بعود...اشفاف الجان جدي الهادي يلثمها
خليني أعاتب خويه خليني...و أسولف لك بعد موقف مأذيني
يا عباس إجه واحد سطر عيني...و صارت عين زينب مثل عين أمها
أسولف بعد لو يا با الفضل كافي...لو أقل لم السوط اشسوه بجتافي
لو أقل لك لهسه يابسه اشفافي...لو أقلك بعد إختك اشألمها
الله ايعين قلبي اشكثر آلامه...أخاف أحجي يخويه وألجم الهامه
واحد قال أريد اسكينه خِدامه...سكينه الواحي بقدسيته يخدمها
برض الشام حالي صعب تفسيره...قعدونه ابخرابه وحيرته حيره
الشمس حرقت وجه إختك يبو الغيره...الأخوها انت عجيبه الدهر يهضمها
يا با الفضل طحنه ابين ناس أرجس... رقيه أحاه رقيه شيبت لي الراس
ماتت فوق راس حسين ياعباس...هوه الموت أخذها وهوه يتمها
رحم الله من قرا الفاتحة للمرحوم والدي والمرحومة الشابة نرجس تحسين
تعليقات
إرسال تعليق