القصيدة: مَحَّدْ فِزَعْ
الرادود: مُحَمَّد الجنَّامِيْ
الشاعر: وسام الشويلي
~~~~~~~~~~~~~~~~~~~~~~
هذا الخبّر إلى كلّ الهِواشم
عدكم عِلِم ذبل غصن المكارم
صوت ارتفع كلمة ابنبرة عتب
مَحَّدْ فِزَعْ ياهل الغيره شعجب؟!
عدكم عِلِم ذبل غصن المكارم
~~~~~~~~~~~~~~~~~~~~~~
ناعينه ناده
حَيهُم يَساده
فوگ المُصايب اجبتكم مصيبه
شدوا الضعينه
من أرض المِدينه
بسامرّه إلكم جنازه غريبه
أي يالهواشم هظيمه چبيره
فخر العشيره صفه بلا عشيره
ابديره غريبه تِحَتْم مصيره
والحيره حيره
شوفوا الخَسن افِزعوا يا عمامه
إلكُم تره يوجهون الملامه
للعسكري لا ثار ولا طَلَب
مَحَّدْ فِزَعْ ياهل الغيره شعجب؟!
عدكم عِلِم ذبل غصن المكارم
~~~~~~~~~~~~~~~~~~~~~~
هِزّوا عَلَمكُم
حشموا زلمكم
جَردوا الصوارم يَأَهب المَهابه
جبتوها لو دم
بالدنيا لو سَم
يوميه واحد يِهِدكم مُصابه
چم واحد الكم صفت وحشه داره
مَحّد فزعله و اخذ بيده ثاره
ما لايگه الكُم طبعكم غياره
چنكم حياره
وكت الزعل وَلا وَكتَه التْراضي
الكُم أشو وَلا لَمعة مواضي
شنهو الخصل ها يليوث العرب
مَحَّدْ فِزَعْ ياهل الغيره شعجب؟!
عدكم عِلِم ذبل غصن المكارم
~~~~~~~~~~~~~~~~~~~~~~
ابساعَة غيابه
عينه اعله بابه
ها يالهواشم اشو ما اجيتوا
مات و دمعته
ترسم غُرْبته
الجنازه تحچي تكلكم بطيتوا
يالما اجيتوا اشبعد ينتظركم
و جرح المصيبه يلچمه عذركم
وسفه الترايب تغيب بدركم
آه يا كسركم
ما يندفن جرح هظمه و مصابه
والعسكري منو ايعوض غيابه
عگب الحسن راح ايزيد التعب
مَحَّدْ فِزَعْ ياهل الغيره شعجب؟!
عدكم عِلِم ذبل غصن المكارم
~~~~~~~~~~~~~~~~~~~~~~
ها يا عمامه
عنده يتامه
لَيرَوّعوهم إفِزعوا بشيّمكم
لحگوا عليهم
واحد يجيهُم
ومثل العقيله يصير بحرمكم
هنا يالرضيتوا و جرعتوا الرزايه
بس لا حرمكُم يطلعَن سبايه
زينب جرحها عليكُم كِفايه
اي صعبه هايه
الكُم حرم وسط ديره غِريبه
هنّه بخطر مصيبتهِن مصيبه
بالطف گبل خدر الحرّه انسلب
مَحَّدْ فِزَعْ ياهل الغيره شعجب؟!
عدكم عِلِم ذبل غصن المكارم
~~~~~~~~~~~~~~~~~~~~~~
هالليله شِدّه
والمَهدي وَحده
كلها تِدوّر عليه و تريده
هوايه جروحه
مطلوبه روحه
واعدائه تنوي اعله گطعة وريده
الله يعينه اعله حمل الإمامه
ايغيب وغيابه جعلنه يتامه
ماندري يمته يعود ابسلامه
البيه الكرامه
يمته الفرج تره اهوايه تعبنه
اخر امل بقه المهدي بگلبنه
بين العده نار و احنه الحطب
مَحَّدْ فِزَعْ ياهل الغيره شعجب؟!
عدكم عِلِم ذبل غصن المكارم
~~~~~~~~~~~~~~~~~~~~~~
~~~~~~~~~~~~~~~~~~~~~~
▫️القصيدة ▪︎[ محد فزع ] ▪︎ اداء | محمد الجنامي ▪︎ كلمات | وسام الشويلي ▪︎المكان | ايران | مدينة المحمرة ▪︎عزاء هيئة الامامين العسكريين ع ▪︎ مجالس شهادة الامام الحسن العسكري ( ع )
تعليقات
إرسال تعليق