قصيدة { يامنهال}محمد بو جبارة مكتوبة

 

يا منهال

أداء الملا محمد بوجبارة

كلمات الشاعر علي البحراني


~~~~
عجيبه اشلون ما تعرفني يا منهال
أنا السجاد واتبدّل عليّه الحال
١
حاسر ليش يبن الهادي والزهرا
متعوّد عليك اعمامة الخضره!
كأنك من سبايا الروم يا حسره
حافي بالشمس ماكو عليك اظلال
٢
شفتك ما عرفتك بالله سامحني
بعدك شاب چاليش الظهر محني؟!
وجهك شاحب ونظراته تجرحني
بعيونك سوالف ما أظن تنگال
٣
اشجابك سيّدي لبْلاد أعاديكم!
وليش الگيد مربوط ابأياديكم
يا مولاي ذابت مهجتي اعليكم
نحلان الجسد وابرگبتك لحبال
٤
يا منهال كافي هيّجت همّي
عاين هالحديد الياكل ابلحمي
أريدن ثوب لا يوصل كسر عظمي
لو تدري ابجرح ساگي اشكثر دم سال
٥
يا منهال أبويه ابكربلا ذبحوه
راس احسين شوفه اعله الرمح خلوه
ما كفّاهم وصدره ابفرس داسوه
ما حصل غسل واتكفّن ابلرمال
٦
مو بس آنا، وَيّايه ترى نسوان!
هذي بالخريبه خت گمر عدنان
يا منهال زينب طبت الديوان!!
واتأشر عليها وتضحك الأنذال
٧
صرنا ابّين وادم باعوا الإسلام
لا تنشدني عنّ الشام آه الشام
يا منهال نظرات الشماته اسهام
وتتأمر علينا صارت الأطفال!
٨
خصيم الگوم باچر جدنا بالمحشر
وعليهم شاهده أم ضلْعِ لمكسر
تراني ابن الصفا والمروه والمشعر
هيهات الدهر ما يمحي ذكر الآل
—————

https://t.me/kooolshiwaklasheeiraq