_*انه العزيزه فاطمه ... انه الحبيبه*_
_*غمضت عينك ونفتح ... جرح المصيبه*_
_*شحجيلك وضاع الهوه*_
_*وماينفع اوياه الدوه*_
_*جرح المصيبه ... جرح المصيبه*_
📌📌___
يالأغله عندي من النفس .. يابويه احس عودي يبس .. جيث انته مايه
وانتهى عمري بروحتك ... ياريت أغيب بغيبتك ... قبل الرزايه
شرايد يراويني الزمن ... وفراقك ابهاي المحن ... هو البدايه
باب المصايب ينفتح ... والجرح من بعده جرح ... واحنه الضحايه
هاي انه روحك فاطمه وهذا انته روحي
وكل يوم بويه غيبتك تكبر جروحي
هيهات مانلتم سوه ... وما ينفع وياه الدوه ... جرح المصيبه
📌📌___
فبرك اترابه مانشف... وفلان اجه ابابك واكف ... والنيه سوده
بالنار يحرك منزلي ... ويصيح طلعيلي علي ... حشم جنوده
يمي وصل ذاك الجمر ... ياوالدي وذاك الخدر ... داسوا حدوده
ضليت الوب وحايره ... وهذا وصيك حيدره ... الخانوا عهوده
بالباب يابويه لذت خاطر حجابي وبقوته الظالم اجه يدفع ابابي
نيرانهم وجهي انجوه ... وماينفع وياه الدوه ... جرح المصيبه
📌📌___
يابويه بلوه بلوتي ... الدخان تارس ريتي ... وظالم يجيني
والباب كل ماينطبق ... يسمع ضلع مني يطق ... يسمع ونيني
بويه طحت وابلا نفس ... الملعون مد رجله ورفس ... اسقط جنيني
ماأدري اسولف ياألم ... عالخد لطمني ابلا رحم ... دم تجري عيني
شمااقوم اطيح من الألم ويسيل دمي
والمحسن ابلايه نفس مطروح يمي
عودي مثل عود التوه ... وما ينفع اوياه الدوه ... جرح المصيبه
📌📌___
اخذو علي وانه قمت ... لكن من اضلوعي طحت ... ماعندي قدره
اتوجه عالحايط صرت ... كوه على طولي اوقفت ... وابقلبي حسره
ناديت وادموعي اتهلي ... ياقوم خلوا علي ... واجروحي كثره
قنفذ رجعلي بالدرب ... تولاني يابويه ضرب ... سطره اعله سطره
من كثر ضرباته طحت فوق الوطيه
ومن ذاك سوطه شاقفت بثنين أديه
بكسرت ضلع جسمي هوع ... ماينفع اوياه الدوه ... جرح المصيبه
📌📌___
ياوالدي هوايه الحجي ... منعوني حته من البجي ... وانه الحزينه
قالوا ولجمولي القلب ... خلي تنوح وتنتحب ... بره المدينه
الشجره الجنت بيها استظل ... قطعوها غايتهم يمل ... قلبي ونينه
بويه اسكنت بيت الحزن ... وعليك كل ساعه تون .... روحي الحنينه
بتراب قبرك سلوتي يوميه اشمه
بكل نفس ياوالدي لجروحي لجمه
بتراب مدفون الضوه ... وما ينفع اوياه الدوه ... جرح المصيبه
📌📌___
احسب احساب وانتظر ... موتي ويخلص هالعمر ... بويه واجيلك
واتشوف خدي المنصفع ... وامن الكسر هذا الضلع ... ارد اشتكيلك
أيامي من بعدك غفه ... ألم اقعد ألم ... يذبح رحيلك
وحشه اليالي ومظلمه ... وتصيح بنتك فاطمه ... ضمني بدليلك
بس النفس ظليت انه محسوبه ميته
والموت صاير طلبتي ومنتظره جيته
وياك كل عمري انطوه ... وماينفع اوياه الدوه ... جرح المصيبه
📌📌___
نسألكم الدعاء وبرائة الذمه ان وجدا اخطاء اثناء نقل القصيده
خادمه لخدمة الزهراء وابنائها عليهم السلام
_*خادمتكم أمينه تسألكم الدعاء*_ 🌹🍃
لا اجيز حذف اسمي
الرادود .. محمد الجنامي
الشاعر .. وسام الشويلي
العراق | البصرة | أبو الخصيب جامع وحسينية الإمام الرضا عليه السلام ذكرى استشهاد الرسول الأعظم محمد صلى الله علية واله
تعليقات
إرسال تعليق