📜 القصيدة: هنا يهلنه
🎤 أداء: مسلم الوائلي
🖋 كلمات: حسن الترابي
هنا يهلنه ..
الليله زينب ميته شوگ الليله
هنا يهلنه ..
بداعت الخوه وغلات الشيله
الخاطر امتوني تجون
ادري زينب ما تهون .. هنا يهلنه
هيه فزعه وانه زينب وحشمتكم
مو خيم محترگه هاي المره اختكم
اتحملوني الليله ميته وتعبتكم
يهلي مو من غربه ضيمي ضيمي منكم
ما عندي احد وشكيله
بس الله وهاي الشيله
... عاتبت هواي
انه الركضت بالعاشر
ولاگوها اخوتها بحافر
... وحيرها الماي
انه الگضتها اركاض بركاض
وعثرت ببنها وگامت انوب
يمكن بطيت وهسه مختاض
يا عون عمك شفته مگلوب
هنا يهلنه ..
ابني جلب بيه ما حاجيته
هنا يهلنه ..
حسين اعز من كلشي وهديته
اعذرني يمه اعذرني عون
ادري زينب ما تهون .. هنا يهلنه
متوني توجعني وبجتني عيوني غفله
الموت اجه وحلفته بس الليله اعطله
ادري ميتين واگولن بلكت الله
ها اجو ها ما اجو ها موتي يله
گلبي يگلي شمنتظره
ياهو الظل من العشره
... حته اتانين
محد من اهلج عايش
حته يوديلج طارش
... مذبوح حسين
وگفت رمح واگفلي الموت
وكلما اعطله يزاود الروح
يحسين يشبه صوتك الصوت
من جبت الأكبر ليه مذبوح
هنا يموتي ..
بلكي من يسمعني اون يفز اليه
هنا يموتي ..
الهاشمي اتگعده نخوة الهاشميه
من الذبح يگعدلي كون
ادري زينب ما تهون .. هنا يهلنه
گلبي بيه الكربله وللخوه يسعه
يوصل شويه من الحسين وارجعه
ما اريد اكثر بعد يكسرني وضعه
طيحتله اعتابي وطيحلي ضلعه
من شال ايده وحيرني
ضيعني الخنصر ضيعني
... بالعاشر ذاك
الخاطرمن تعبت اختك
الخاطرمن ما عاتبتك
... لو ميته وياك
لأختك لگيتك تارس الگاع
من الليل المن بيك لليل
كلما اكمل صدرك الضاع
ترجع تطشر صدرك الخيل
گتلي زينب ..
نحري يوجعني ولجمني الذاري
گتلي زينب ..
خلي كلشي وغطي صدري العاري
غارت وياك العيون
ادري زينب ما تهون .. هنا يهلنه
انه يحسين العزيزه الليله ميته
المسحت بشيلتها دمك وانته سكته
يمك وگتلي انتي ياهي وگتلك انته
فتشتلي عيونك وگلبك لجمته
گتلك يحسين اعذرني
وغمضت عيونك عني
... من شفت احبال
ما هان عليه وگتلك
يبن امي الموت ارحملك
... من هذا الحال
ذباحك يباوع عله اختك
يدنه وانه ادنه عنك
گدامي گام يحز رگبتك
يعذبني كلما زاد ونك
عذبتني ..
بالشمس نايم غطاك الذاري صاير
عذبتني ..
وبين الضلوع انكسر يبن امي حافر
ما بقه من الخوه لون
ادري زينب ما تهون .. هنا يهلنه
يا هلي گلبي اعله طاري الخوه ذايب
الليله ما تگضي اعله خير الليله اعاتب
ليش اختكم من اديكم للخرايب
روحي يبست جنها دمكم عالشوارب
ما بيه اعتب يهلي اكثر
متعوبه من اركاض البر
... يخوان الروح
لم من الخيل الضايع
يحسين ام عون اتنازع
... وكاتلها النوح
كون اهلي بالموت اليشيعون
موش بجفن طولي بحصيره
وملثم وحافي الگمر كون
ومنگبه شيوخ العشيره
هنا يخوتي ..
العزيزه الميته تنهاب من اهلها
هنا يخوتي ..
والنعش ما يثگل بجتف الكفلها
الليله لا تتعطلون
ادري زينب ما تهون .. هنا يهلنه
°°°°°°°°°°°°°°°°°°°°°°°°°°°°°°°°
أسألكم الفاتحة والدعاء لوالدي
ولجميع ارواح المؤمنين والمؤمنات
تعليقات
إرسال تعليق