استغاثات |الملا علي بوحمد| كلمات مكتوبة إستشهاد فاطمة الزهراء (عليها السلام) "الرواية الاولى" 1441- 2019
كلمات الشاعر_كرارحيدر الخفاجي
استغاثات. آهات. محد سمعها
فاطمه اتصيح. واتطيح. هيه ودمعها
واني مجبور. مكسور. گلبي اوضلعها
هذا صاير واني صابر
اسمعتها اتصيح وانا بهذا وضعي
ياريت الصيحه ما مرت بسمعي
او قبل دمعتها طاح ابخدي دمعي
مشيت ولازم ابﭼـفيني ضلعي
استغاثات اربعه منها.. بدت والموت لاحگها
بحه بصوتها امبينه .. لٲن دخان خانگها
صعبه ياناس.. ينداس. جدامي بيتي
عندي من هاي. بهواي. اسهل منيتي
ما اسل سيف. تكليف. ﭼـانت وصيتي
كلشي گادر.. واني صابر
استغاثه الاولى ﭼانت"يامحمد"
على بنيتك يبويه انمدت اليد
واذا رايد علامه اتلمس الخد
تره امن السطره صاير لونه اسود
استغاثت لاكن الهادي.. يگوم شلون من ڰبره
لو حي بعده من يگدر.. يمد ﭼفـــه على الزهـره
ابفاطمه اشصار. والنار. تاكل بديها
اتدور احجاب. والباب.طاحت عليها
تتجه وين. وحسين.يسمع بﭼيـهـا
گلبه حاير.. واني صابر
استغاثه الثانيه زادتلي حزني
دخيلك"ياعلي"اسمعها بذني
تره المحسن يحيدر طاح مني
درت وجهي واصيح اسم الله يبني
منطي للنبي احـﭼـايه..لازم ﭼـفي من عدها
والا فاطمه اگبالي.. تصيح او ما اساعدها
گوه قاسيت. عديت. هاي المهمه
ابني معقول. مـﭼـتول. واگماطه دمه
عالجمر طاح. بس صاح. من عصروا امه
ماكو ناصر.. وآني صابر
استغاثه الثالثه الدمعي تفرضه
تصيح الزهره لحگيني يفضـه
اعله كيفـﭺ فضه آنه ابضلعي رضه
واحس بيني او بين الموت لحضه
گامت فاطمه او فضه.. تحاذر خاف تلـﭼمها
لأن كسر الضلع كل ما.. تتنفس يألمها
دم الضلوع. مطبوع. ظل اعله بابي
عالحياطين. ناسين. صورة عذابي
ابن ادم يخاف. لوشاف. شي من مصابي
ما يكابر.. واني صابر
استغاثه الرابعه اسمعها وحدي
تصيح الزهره ادركني"يمهدي"
اريدك يبني تطلب ثار خدي
ابسلامه لا تخليها تعدي
تدري الثار ما ينرد.. بس المهدي اليطلبه
والگاطع اراكتها..هم فوگ اشجره يصلبه
باﭼـر يعود. موعود. من رضوه قادم
يطلب الثار. لوغار. شبل الهواشم
نصره لو ذاع. عالگاع. مايبقه ظالم
راح اناطر.. واني صابر
عگب هاي استغاثات الزجيه
عشت لحظات اقسه امن المنيه
تمنيت بسلامه اترد اليه
او انه الي تنكسر ضلعين بيه
زهرة عمري جدامي.. ذبلت والغصن محني
تراهي الدنيه متعمده.. ابفگد الزهره تجرحني
كل هالايام. آلام. بيها او مصايب
اثمنطعش عام. وتنام. جوه الترايب
ضاعت احلام. مادام. وصل الحبايب
جفني ساهر.. واني صابر
تعليقات
إرسال تعليق